خورشتی پێستی Itchy scalp سەر مایەی ناڕحەتییەكی زۆرە بۆ ئافرەت و گەلێك جار هۆكارە بۆ تەنكبوونی قژ. پسپۆڕانی پێست جەخت لەوە دەكەنەوە كە هۆكاری خورشتی پێستی سەر دەگەڕێتەوە بۆ ئەم نەخۆشییانەی خوارەوە: یەكەم، نەخۆشی شەكرە كە هۆكارە بۆ زوو پیربوونی پێست لەگەڵ وشكبوونی پێستی سەر و پەیدابوونی تفر و خورشت، ئەمەش بە كۆنتڕۆلكردنی شەكری خوێن چارەسەر دەبێت. دووەم، توێشك، یان كڕێژ، هەروەها هەوكردن بە كەڕوو لەگەڵ زیاد چەوربوونی پێستی سەر، هەندێك جاریش رشكی سەر. سێیەم، هەستەوەری، یان ئەكزیما لە پێستی سەردا. چوارەم، ڤایرۆسی زووستەر Zooster كە وەكو تامیسكە بڵۆق پەیدا دەكات، گەلێك جار كە دوچاری شوێنێكی دەموچاو دەبێت لەوانەیە كە بۆ پێستی سەریش بڵاوبێتەوە و ببێتە ئەگەری خورشتێكی توند و ئازار، هەندێك جاریش قژهەڵوەرین. پێنجەم، نەخۆشی سەدەف Psoriasis لە پێستی سەردا كە هاوكات دەبێت لەگەڵ كڕێژی زۆر و قژهەڵوەرین و سووربوونەوەی پێست.
