گەلێک ئافرەت زانیاری تەواویان نییە لەسەر چۆنییەتی ھەڵبژاردنی جۆری جلی ژێرەوە Panties کە تەندروستییانە بێت و نەبێتە ھۆی ھەوکردن لە کۆئەندامی زاوزێ و میزەرۆِدا، ھەروەھا نەبێتە ھۆی سووربوونەوە و سووتانەوەی پێست یان ھەتا ھەوکردنی پێست بە کەڕوو. ستایل و قوماشی یان ماددەی جلی ژێرەوە گرنگی زۆری ھەیە، بۆ نموونەجلی ژێرەوەی لۆکەیی کە ھەموو بەشەکان داپۆشێت ھەڵبژاردەیەکی تەندروستییانەیە. جلی ژێرەوە ئەگەری ھەوکردن کەم دەکاتەوە بەتایبەتی لەکاتی سووڕی مانگانەدا، بۆ نموونە دانانی سانتی بە تەنیا رێگا لە گەیشتنی بەکتریا بە زێ ناگرێت ئەگەر جلی ژێرەوەی گونجاو لەسەر سانتی لەبەر نەکرێت. جلی ژێرەوەی لۆکەیی زۆر گونجاوە بۆ تەندروستی و پاکوخاوێنی، چونکە نەرمە و لە رووی کێشەوە سووکە، ھەروەھا رێگا بە ھاتوچۆی ھەوا دەدات و گونجاوە بۆ ئەنجامدانی ھەموو جۆرەکانی مەشقی وەرزشی سووک و مامناوەندی. ھەندێک جۆری جلی ژێرەوە گونجاو و تەندروستییانە نین، بۆ نموونە ئەوانەی کە رۆخەکانیان بە قایشێکی باریک داپۆشراوە Thong، چونکە بە ئاسانی رێگا بە گەیشتنی بەکتریا بۆ زێ خۆش دەکات و ئەگەری ھەوکردن لە کۆئەندامی میزەڕۆدا زیاد دەکات، ئەم ئەگەرانە زیاتر دەبن لە رۆژە گەرمەکان و لەکاتی مەشقی وەرزشی و زیاد ئارەقەکردندا. بۆ ئافرەتێکی ئاسایی فەرمانبەر یان ژنی ماڵەوە، جلی ژێرەوەی لۆکەیی زۆر گونجاوە. جلی ژێرەوەی گونجاو بۆ مەشقی وەرزشی ئەوانەن کە لە ماددەی پۆلیستیەر Polyester دروستکراون کە شێ و ئارەقە ھەڵدەمژن.
