تا بە خۆراكێك بگوترێ ئۆرگانیك Organic foodsدەبێ بكەوێتە ژێر چەندین ستانداردی پەیوەست بە بەرهەمهێنان. تا پێش سەدەی بیستەم هەموو بەرهەمە كشتوكاڵییەكان ئۆرگانیك بوون، بەڵام پاشان چەندین ماددەی كیمیایی و پەینی كیمیایی بە مەبەستی زیادكردنی بەرهەم و مەبەستی تر خرانە ناو بواری كشتوكاڵەوە. ئەو خۆراكانە نابنە ئۆرگانیك ئەگەر: بە بەكارهێنانی پەین و ماددە بكوژەكانی مێروو و بكوژەكانی گیایە زیانبەخشەكان لە كشتوكاڵدا بەرهەم بهێنرێن، هەروەها بەكارهێنانی هۆرمۆنی گەشە و ماددە دژەژییەكان بۆ چێڵ و ئاژەڵە شیردەرەكانی تر بە مەبەستی زیادكردنی بەرهەمی شیر و زیادبوونی كێش، ئەو خۆراكانەی كە بە مامەڵەی جینی بەرهەم دەهێنرێن، بەكارهێنانی تەكنۆلۆژیای نانۆ Nanotechnology بۆ خۆراك و كشتوكاڵ. پەسندكردنی خۆراكی ئۆرگانیك دەگەڕێتەوە بۆ ئەوەی كە: ڕێژەیەكی بەرز لە ڤیتامین و ماددە دژەئۆكسانەكان و چەورییە ناتێرەكان و ئۆمیگا 3 لەخۆدەگرن، ڕێژەی كەم لە ماددە خراپەكان لەخۆدەگرن وەكو كانزا قوڕسەكان و پاشماوەی ماددە بكوژەكانی مێروو. خۆراكی ئۆرگانیك لە چەندین سیفەتی تر جیاوازی لەگەڵ خۆراكی نائۆرگانیكدا هەیە، بۆ نموونە لە لێكۆڵینەوەكاندا هاتووە كە سێوی ئۆرگانیك لە چێژدا شیرینترە، توندی و پتەوی باشترە، بەڵام نرخی خۆراكی ئۆرگانیك بەگشتی بە ڕێژەی 40%-10 یان زیاتر لە خۆراكی ئاسایی گرانترە.