سه‌رچاوه‌كانی هه‌واڵ له‌ نێو ئۆپۆزسیۆنی سوریا له‌ شارۆچكه‌ی زه‌به‌دانی رایانگه‌یاند كه‌ ئۆتۆمبێلی فریاكه‌وتن و چه‌ند پاسێك چوونه‌ته‌ ناو شارۆچكه‌ گه‌مارۆدراوه‌كه‌ كه‌ كه‌وتۆته‌ ژێر ده‌ستی هێزه‌كانی ئۆپۆزسیۆنى سوریا بۆ گواستنه‌وه‌ی ژماره‌یه‌ك چه‌كداری بریندار بۆ توركیا به‌پێی رێككه‌وتنێكی نێوان لایه‌نه‌ ناكۆكه‌كان ، ئه‌م رێككه‌وتنه‌ش له‌ ژێر سه‌رپه‌رشتی نه‌ته‌وه‌ یه‌كگرتوه‌كان ئه‌نجام ده‌درێت .

به‌پێی رێككه‌وتنه‌كه‌ رێگه‌ به‌و چه‌كدارانه‌ ده‌درێت كه‌ ماوه‌ی چه‌ند مانگێكه‌ له‌ زه‌به‌دانی نزیك سنووری لوبنان خۆیان حه‌شارداوه‌ بچنه‌ فرۆكه‌خانه‌ی به‌یروت و له‌وێوه‌ به‌ره‌و توركیا ره‌وانه‌ بكرێن ، ئه‌و كاره‌ش له‌لایه‌ن لێژنه‌ی نێوده‌وڵه‌تی خاچی سووره‌وه‌ به‌رێوه‌ ده‌چێت .

هاوكات ژماره‌یه‌ك پاسیش نزیكه‌ی سێسه‌د خانه‌واده‌ی گیرخواردووی شیعه‌ مه‌زهه‌ب له‌ پارێزگای ئیدلیب باكووری رۆژئاوای سوریا كه‌ كه‌وتۆته‌ ژێر ده‌سه‌لاتی ئۆپۆزسیۆن ده‌چنه‌ توركیا و له‌وێوه‌ش له‌ رێگه‌ی فرۆكه‌وه‌ به‌ره‌و به‌یروت ره‌وانه‌ ده‌كرێن .