“عه‌لی خامنه‌یی” ڕابه‌ری باڵای كۆماری ئیسلامی ئێران، گوتی: ” ئێران ڕێگه‌ نادات به‌دابه‌شكردنی عێراق و سوریا”. هاوكات دڵته‌نگی خۆی ده‌ربڕی بۆ حاڵی خه‌ڵكی یه‌مه‌ن. به‌ڵێنی ئه‌وه‌یشیدا كه‌به‌ره‌نگاری هه‌ژموونی ئه‌مریكا له‌ناوچه‌كه‌دا ببنه‌وه‌.



به‌گوێره‌ی ئاژانسی هه‌واڵی “فارسنیوز” ڕابه‌ری باڵای ئێران گومانی خۆی ده‌ربڕیوه‌ له‌وه‌ی ئه‌و ڕێككه‌وتنه‌ په‌سه‌ند بكرێت كه‌له‌نێوان ئێران و شه‌ش وڵاته‌كه‌دا واژۆكرا، سه‌باره‌ت به‌ دۆسیه‌ی ئه‌تۆمی. چ له‌تاران و چ له‌ده‌ره‌وه‌ی تاران.


پێشتریش ڕاپۆرته‌ هه‌واڵییه‌كانی میدیاكانی ئێران ئه‌وه‌یان بڵاوكرده‌وه‌ كه‌ ڕابه‌ری باڵای ئێران له‌ڕێككه‌وتنه‌كه‌ نیگه‌رانه‌.له‌به‌رانبه‌ریشدا “باراك ئۆباما” دووچاری ناڕه‌حه‌تی و له‌مپه‌ر بووه‌ له‌وه‌ی كۆنگریس قایل بكات به‌ په‌سه‌ندكردنی ڕێككه‌وتنه‌كه‌.


خامنه‌یی له‌میانه‌ی پێشوازی كردنیدا له‌ به‌شداربووانی كۆبوونه‌ویه‌ كۆڕبه‌ندی جیهانی ئه‌هلوبه‌یت و، كۆبوونه‌وه‌ی یه‌كێتی ڕادیۆ و ته‌له‌فزیۆنه‌ ئیسلامییه‌كان، گوتی: ” ئه‌وان به‌وه‌همی خۆیان وایان دانابوو كه‌له‌میانه‌ی ئه‌و ڕێككه‌وتنه‌وه‌ ڕێگه‌یه‌ك بۆ خۆیان ده‌دۆزنه‌وه‌، تاكو لێیه‌وه‌ دزه‌ بكه‌نه‌ ناو وڵاته‌كه‌مان. ئه‌و ڕێككه‌وتنه‌ چاره‌نوسی نادیاره‌. چ لێره‌، چ له‌وێ. به‌ڵام ئێمه‌ ئه‌و ڕێگه‌یه‌مان داخست. زۆر به‌توندیش دایده‌خه‌ین”.


هه‌روه‌ها گوتی: ” ڕێگه‌ ناده‌ین به‌ دزه‌كردنی ئابوری ئه‌مریكا بۆ ناو وڵات، ڕێگه‌ناده‌ین به‌ دزه‌كردنی سیاسی و فه‌رهه‌نگی ئه‌مریكا بۆناو وڵات. به‌وپه‌ڕی هێزه‌وه‌ به‌ره‌نگاری ده‌بینه‌وه‌”.


جگه‌ له‌وه‌ش گوتی: ” ئه‌مریكییه‌كان ده‌یانه‌وێت هه‌ژموونی خۆیان به‌سه‌ر ناوچه‌كه‌دا بسه‌پێنن. نه‌خشه‌كانی خۆیان جێبه‌جێ بكه‌ن. به‌ڵام ئێمه‌ ڕێگه‌ به‌وه‌ ناده‌ین، له‌كاتێكدا ئه‌وان ده‌یانه‌وێت عێراق و سوریا دابه‌ش بكه‌ن، ئه‌و دابه‌ش بوونه‌ ڕوونادات”.













باس