وه‌زیری به‌رگری وڵاته‌ یه‌كگرتووه‌كانی ئه‌مریكا ئاشتۆن كارته‌ر ده‌ڵێت وڵاته‌ یه‌كگرتووه‌كانی ئه‌مریكا به‌ره‌وپێشچوونی به‌ده‌ست هێناوه‌ له‌ شه‌ڕی دژی ڕێكخراوی توندڕه‌وی ده‌وڵه‌تی ئیسلامیدا له‌ عێراق به‌ڵام ده‌شڵێت ناتوانێت پێشبینی بكات ئایا ئه‌م شه‌ڕه‌ چه‌ندێك ده‌خایه‌نێت. له‌ میانه‌ی كۆنفرانسێكی هاوبه‌شی ڕۆژنامه‌وانیدا له‌ سیۆل له‌گه‌ڵ وه‌زیری به‌رگری كۆریای باشور، كارته‌ر گوتوویه‌تی ناگاته‌ ئه‌وه‌ی بڵێت ئه‌م ڕه‌وشه‌ی ئێستا سه‌ره‌تای كۆتاییهاتنی ده‌وڵه‌تی ئیسلامیه‌ له‌ عێراق.

هه‌ر له‌ لێدوانه‌ ڕۆژنامه‌وانیه‌كه‌یدا وه‌زیری به‌رگری وڵاته‌ یه‌كگرتووه‌كانی ئه‌مریكا ده‌شڵێت هێشتا په‌نتاگۆن ئاماده‌ نییه‌ بۆ تاووتوێكردنی شیانی دانانی سیسته‌می پێشكه‌وتووی موشه‌كی به‌رگری له‌ سیۆل. به‌ڵام كارته‌ر ده‌شڵێت به‌ڵام له‌شكری ئه‌مریكا ئاماده‌یه‌ بۆ دانانی چه‌كی نوێ له‌ ناوچه‌كه‌دا له‌وانه‌ كه‌شتی جۆراوجۆری هێزی ده‌ریایی و هه‌روه‌هاش ئه‌و جۆره‌ فڕۆكه‌ جه‌نگیانه‌ی ڕادار ئاشكرایان ناكات.