نیوەڕۆی ئەمڕۆ وەلید موعەلیم وەزیری دەرەوەی سووریا، لە کۆنگرەی رۆژنامەوانیدا لە دیمەشق، پێشوازی سووریای لە بڕیاری ئەنجوومەنی ئاسایشی نێودەوڵەتی سەبارەت بە گرووپە چەکدارەکانی عێراق و سووریا راگەیاند و گوتی " لەسەر ئاستی ئیقلیمی و نێودەوڵەتی ئامادەی هاریکارین دژی تیرۆر و پێشوازی لە بڕیاری ئەنجوومەنی ئاسایشی نێودەوڵەتی دەکەین، سەبارەت بە گرووپە تیرۆریستییەکانی عێراق و سووریا".

وەزیری دەرەوەی سووریا، جەختی لەوە کردەوە، کە وڵاتەکەی سوورە لەسەر هەڵوێستی خۆی و گوتی " هەموو هەوڵێک دژی تیرۆر لە سووریا دەبێت بە هەماهەنگی لەگەڵ حکومەتی سووریا بێت و سوورین لەسەر هەڵوێستی خۆمان بەرامبەر ئەو لایەنانەی پشتیوانی تیرۆر دەکەن".

موعەلیم نیگەرانی سووریای سەبارەت بە وڵاتانی دراوسێی سووریا پیشاندا و گوتی: "وڵاتانی ئیقلیمی و دراوسێ پابەندی بڕیاری ئەنجوومەنی ئاسایش نەبوون، ئەگەر وڵاتانی ئیقلیمی پابەندی بڕیاری ئەنجوومەنی ئاسایش نەبن هیچ کاریگەریی نابێت و بە تەنیا دەبێتە مەرەکەبی سەر کاخەز".

موعەلیم بەتووندی سەرکۆنەی کوشتنی رۆژنامەڤانە ئەمریکییەکەی کرد و گوتی "سووریا بە بەهێزترین دەربڕین سەرکۆنەی کوشتنی رۆژنامەوانی ئەمریکی جەیمس فولی دەکات"، بەڵام ئاماژەی بۆ ئەوەشکر کە "نابێت دووفاقی لە رووبەڕووبوونەوەی تیرۆردا بکرێت".








رووداو