14ی‌ كانوونی‌ دووه‌م/ یه‌نایه‌ر (گوڵان میدیا)- له‌ هۆڵی ئه‌نجومه‌نی رێكخراوه‌ ناحكومییه‌كانی كوردستان IKNN له‌ هه‌ولێر به‌ئاماده‌بوونی هۆشیار مالۆ نوێنه‌ری سه‌نته‌ری نێوده‌وڵه‌تی یاساكانی رێكخراوه‌كانی كۆمه‌ڵی مه‌ده‌نیICNL و هۆگر چه‌تۆ له‌ تۆرِی ماف و زه‌یتۆ سیان نوێنه‌ری یۆنامی له‌ هه‌رێمی كوردستان و كاكه‌ ئه‌حمه‌د جه‌میل رێكخه‌ری ئه‌نجومه‌نی رێكخراوه‌ ناحكومییه‌كانی كوردستان و به‌ به‌شداری نوێنه‌ری زیاتر له‌ 25 رێكخراوی ناحكومیی و نوێنه‌ری ئه‌نجومه‌نی بالاَی كاروباری خانمان، تۆرِی ماف بۆ یاسای رێكخراوه‌ ناحكومیه‌كان به‌هاوكاری سه‌نته‌ری نێوده‌وڵه‌تی یاساكانی رێكخراوه‌كانی كۆمه‌ڵی مه‌ده‌نیICNL ده‌ستی كرد به‌ جێبه‌جێكردنی پرِۆژه‌ی رِاوێژی به‌رده‌وام، پرۆژه‌كه‌ ئامانجیه‌تی رێكخراوه‌ ناحكومیه‌ ناوخۆ و بیانیه‌كان به‌شداربن له‌ دارشتنی ته‌واوی رِێنمایی و رِاسپارده‌ و فۆرم و كاره‌كانی فه‌رمانگه‌ی رێكخراوه‌ ناحكومیه‌كان وه‌كو چۆن هاوكارو به‌شداری ده‌ركردنی یاسایی ژماره‌ (1) ساڵی 2011 یاسایی ریكخراوه‌ ناحكومیه‌كان له‌ هه‌رێمی كوردستان بوو.
ئێستا فه‌رمانگه‌ی رێكخراوه‌ ناحكومییه‌كان سه‌رقاڵی رێكخستنی فۆرِمه‌كانی تایبه‌ت به‌ تۆمار و گونجاندنه‌ بۆ رێكخراوه‌ كوردستانی و عێراقی و بیانی و تۆرِبه‌ندی له‌ هه‌رێمی كوردستان، بۆیه‌ لایه‌نه‌ په‌یوه‌ندیداره‌كان ئه‌م سیمیناره‌یان به‌ پێویستزانی.
له‌ سیمیناره‌كه‌دا گفتوگۆ ده‌رباره‌ى فۆرمه‌كانی تۆماری رێكخراوه‌كان كرا كه‌ بریتی بوو له‌ فۆرمه‌كانی: فۆرمی ژماره‌ (1) تایبه‌ت به‌ رێكخراوه‌ ناحكومیه‌ كوردستانییه‌كان، فۆرمی ژماره‌(2) تایبه‌ت به‌ رێكخراوه‌ ناحكومیه‌ عێراقییه‌كان، فۆرمی ژماره‌ (3) تایبه‌ت به‌ رێكخراوه‌ ناحكومیه‌ بیانیه‌كان، فۆرمی ژماره‌ (4) تایبه‌ت به‌ تۆرِه‌كان، فۆرمی ژماره‌ (5) تایبه‌ت به‌ گونجاندنی رێكخراوه‌ ناحكومیه‌كانی هه‌رێمی كوردستان، له‌م پرۆژه‌یه‌دا پێنج وۆركشۆپ رێكده‌خرێت به‌مه‌به‌ستی وه‌رگرتنی رِاو سه‌ره‌نجی رێكخراوه‌كان، دواتر وه‌كو رِاسپارده‌ پێشكه‌ش به‌ فه‌رمانگه‌ی رێكخراوه‌ ناحكومییه‌كان ده‌كرێت.