نووسەرو رۆماننووسی بە توانا جەزا چنگیانی لەمیانی ساڵی 2018 دا، دوو رۆمان و نۆڤێڵتێكی بەچاپ گەیاند كە هەر یەكەیان بە تیراژی(500) دانە كەوتوونەتە بەردەستی خوێنەران..
(كچم خوا گەورەیە)كە چاپی دووەمی ناونیشانی رۆمانێكە كە لەتوێی(246) لاپەڕەی قەبارە مامناوەندیدا بڵاوی كردۆتەوە، لەپێشەكی رۆمانەكەدا، رۆماننووس باس لەوە دەكات كە وشە لاساییكردنەوەی كردارە لە رێگەی وتن و نووسینەوە، وشەیەك كاتێ دەبێت بە وشەیەكی رەسەنی زمان بتوانرێت مانایەكی پوختە و ئاستی بەكارهێنانی زۆر بێت. لەم رۆمانەدا جەزا چنگیانی چەندین وشەی نوێی بەكارهێناوە، كۆمەڵە وشەیەك چ وەك مانا چ وەك ئیستاتیكای زمان و پێكهاتەی جەستەی رستە و ئیستاتیكای رۆحی دەستەواژەو دەق، هیچ وشەیەكیش بێ بوونی كردار بوونی نییە. لەم رۆمانەدا رۆماننوس رۆڵی سیناریۆی لە نووسینی رۆمان و نۆڤل و چیرۆكدا كردۆتە ئاوێنە بۆ زەهنی خوێنەر لەپێناو بینینی رووداوەكانی ناو دەقەكە، لە كۆتاییدا جیاوازییەكی خستۆتەڕوو لەنێوان خەیاڵ و لۆژیكدا، ئاماژەش بەوە دەكات كە پرۆژەی لۆژیك شانسی پیادەكردنی زۆرە، بەڵام پرۆژەی خەیاڵ لە پراكتیكدا سنووری تەسكە.
(پاتریساو دیارییەكەی) رۆمانێكی دیكەی جەزا چنگیانییە، نووسەر لەتوێی(160) لاپەڕەی قەبارە مامناوەندیدا رۆمانەكەی پێشكەشكردووە بە خانمی قارەمان و پێشەنگی رێگەی هاوسەنگیی مافەكانی ئافرەت لە كۆمەڵدا، هەروەها بە خانمی پێشمەرگەی كوردیی سویدی(فاتیمە شاهیندال).. ئەم رۆمانە بەشێكە لە بیركردنەوەو خەو خەم و ویست و ئارەزوو و چیرۆكی ژیانی خودی نووسەر(هەر وەك خۆی دەڵێت)، لە رۆمانەكەدا راستگۆبوون یەكێكە لە بونیادە بەهێزەكانی راگرتنی تەلاری دەق و رێزی خوێنەر، لەم رۆمانەدا جەزا هەوڵیداوە لەنێوان مرۆڤە رەنگ جیاوازەكاندا پردێكی خۆشەویستیی مرۆڤایەتی درووست بكات، بەدوای ئەوەدا وێڵە بۆچی ئافرەتی ئەوروپی لە رۆمانسێتیی رۆحی پیاوی رۆژهەڵاتی تێناگەن، لە رۆمانەكەدا زۆربەی پاڵەوانەكانی ئافرەتن، ئەمەش بڕوای خۆیەتی بە رۆڵی ئافرەت لە رازاندنەوەو بەردەوامیی ژیان و بەختیاریی مرۆڤایەتیدا نیشاندەدا.
(رێحان) ناوونیشانی نۆڤلێتێكی جەزا چنگیانییە، لە (125) لاپەڕەی قەبارە مامناوەند، نووسەر لە پێشەكی كتێبەكەیدا بەر لەوەی بچێتە نێو رووداوەكانی ئەم چیرۆكە درێژەوە، وەسفێكی ژیان دەكات كە بەدەر نییە لە جوانوانی(ئێستاتیكا)و بێ ئەو ماناو نرخی نییە،لەم رووەوە دەڵێت: ژیان مانای رەسەن و فەلسەفییە بوونییەكەی و بەكورتی و بێ رتووشكردنی ویستی نووسەر ، واتا ئازادی، ئەم ئازادییەش خوێندنەوەیەكی سۆفیگەرییە بۆ ویستی مرۆڤ.كەواتە ژیان و ئازادی یەكدی تەواودەكەن.