Hêzên Parastina Gel (HPG) ku baskê çekdarî yê PKKê ye ragihand ku têkiliyan wan bi teqîna Sidekanê re nîne ku di wê teqînê de pêşmergeyek şehîd bibû.

Navenda Ragihandin û Çapemeniyê ya HPGê derbarê teqîna li Sidekanê daxuyaniyeke niviskî da û red kir ku destê wan di wê teqînê de hebe.

Şeva derbasbûyî li herêma Sîdekan a ser bi qezaya Soranê ve ku girêdayî parêzgeha Hewlêrê ye, di dema derbasbûna wesayîta 2 Pêşmergeyan de teqînek çê bû.

HPG di daxuyaniya xwe dibêje ku hêzên me ji wê teqînê ne berpirs in.

Di daxuyaniya HPGê de wiha hate gotin: “12 Adarê li herêma Sidekanê teqînek çêbûye, di vê teqînê de yek pêşmegeyê PDKê jiyana xwe ji dest daye û yek jî birîndar bûye. Têkilî vê rûdanê hin nûçe hatine çêkirin û tevgera me berpirs hatiya nîşandan.

Ev rûdana biêş li tengava Sidekanê ya qada Sidekan a herêma Xakurkê çêbûye. Cihê navborî hê ji dema Sedam ve gelek mayin lê hatine danîn. Salên 2019-2020an jî li dijî êrîşên dewleta Tirk a dagirker a li ser herêma Xakurkê jî hin cih hatine mayinkirin. Hem gelê herêmê û hem jî rayedarê herêmê yê PDKê hatiye agahdakirin ku ev dever qadeke leşkerî û mayinkirî ye û hişyariyên hewce hatine kirin. Lê 12ê Adarê li gel ku ev hêl hemû dihatin zanîn jî hêzên PDK'ê çûne eraziya mayinkirî û bi encama vê rûdana biêş çêbûye. Ti têkiliya hêzên me bi vê rûdanê re nîne û ji vê teqînê hêzên me ne berpirs in.”

Çi bibû

Şeva 12 Adarê li herêma Sîdekan a ser bi qezaya Soranê ve ku girêdayî parêzgeha Hewlêrê ye, di dema derbasbûna wesayîta 2 Pêşmergeyan de teqînek çê bû û pêşmergeyekî jiyana xwe ji dest da û pêşmergeyek jî birîndar bû.

Fermandarê Fermandariya Helgurd a yekeya 80, Lîwa Behram Erîf Yasîn, ji Rûdawê re ragihand, “Erkê wan pêşmergeyan li Balekatiye û xelkê navçeyê bûn. Xwestine serdana gundê xwe bikin û li tengava Sînganê a ser bi Sîdekanê ve TNT bi otomobîlan wan ve teqiyaye.”

Bi gotina Lîwa Behram, “TNT nû bûye û di çend rojên derbasbûyî de ji aliyê gerîlayên PKKê ve li wê herêmê hatiye danîn.”

Rudaw