Li navçeya Uzundere ya Erzeroma Bakurê Kurdistanê di êrîşa hirçê de kesekî canê xwe ji dest da û 2 kes jî birîndar bûn.

Li gor agahiyên berdest, li Ulubaxa taxa Uzundereyê Mustafa Oneş ê 81 salî li hewşa mala xwe rastî êrîşa hirçê hat.

Gulsun Oneş a xanima Mustafa Oneş jî dengê mêrê xwe bihîst û li ser vê gazî cînaran kir ku werin hawarê.

Hirçê Mustafa Oneş birîndar kir ji hewşê revî û rastî Ayşe û Murat Yildizê ku li qadê guz kom dikirin hat.

Hirçê Ayşe û Murat Yildiz jî birîndar kir û paşê revî çû.

Tîmên tendirustiyê birîndar bo nexweşxaneya li navçeyê veguhestin û paşê birîndar bo nexweşxaneyên li Erziromê şandin.

Mustafa Oneş ê di êrîşê de birîndar bibû tevî midexaleyan ji mirinê xilas nebû.

Hat ragihandin ku rewşa Ayşe û Murat Yildiz baş e.

Rudaw