لە شاری هەولێر پەردە لەسەر پەیكەری مەقامبێژ و هونەرمەندی دیاری كورد(فوئاد ئەحمەد) لادرا

ئەم پەیكەرە لەسەر ئەركی پارێزگارى هەولێر و بە هەماهەنگى کۆمەڵەى هونەر و وێژەیی کوردى مەڵبەندى گشتیى جێبەجێ كراوە,هەروەها پەیكەرەكە لەلایەن هونەرمەندی پەیكەرساز(عومەر جەمیل) درووست كراوە.

هەر لەم مەراسیمەدا بەسەرپەرشتی هونەرمەند و موزیكژەن (سەید ئەحمەد رەواندزی) و بە بەشداری چەند موزیكژەنێكی بەتوانا چەند بەرهەمێكی هونەرمەند فوئاد ئەحمەد گوترایەوە.

هونەرمەند (فوئاد ئەحمەد سلێمان) لە ساڵی1932 لەگوندی عەوێنەی سەر بەشارەدێی گوێڕ لەدایکبووە، ساڵی 1940 چۆتە قوتابخانە پاشان خانەی مامۆستایانی لادێ لە دھۆك تەواو کردووە، لەسەرەتا لەگوندی عاڵڵا (عەبدوڵڵا گوجیلان) و گردعازەبان چەند شوێنێکی دیکەش بووەتە مامۆستا، بۆ یەکەمجار ساڵی 1955 چۆتە ئێستگەی بەغدا و لەوێدا یەکەم گۆرانی بەناوی (نەورۆز) تۆمار کرد،دواتر لە ساڵی 1959 گۆرانی (ئەمیرەکەم) ی تۆمارکرد كە ئەم بەرهەمە دیارترین گۆرانی ئەم هونەرمەندەیەو لەلایەن زۆرێك لە گۆرانبێژان گوتراوەتەوە، لە پاشان گۆرانی (نامەکەت گەیشت) و (سروەی بەیان )و لەگەڵ چەند گۆرانییەکی دیكەی بڵاوكردەوە، لە ساڵی 1963، گۆرانی (ئەی بووکی تازە) و بۆ شۆڕش (سرودی ئێمە کوردین نابەزین)ی تۆمارکرد، تاوەکو ساڵی 1986 نزیکەی سەد گۆرانی لە ئێستگە و پەنجا گۆرانیش لە تەلەڤزیۆن تۆمار کردووە.

دوای تەمەنێکی دوورو درێژ لە خزمەتی هونەری کوردی،هونەرمەند فوئاد ئەحمەد لە 17ی ئابی 2004، لە وڵاتی هۆڵەندا کۆچی دوایی كرد, دوای پێنج ڕۆژ تەرمەكەی گەیشتەوە كوردستان و لە ڕێوەرسمێکی شکۆداردا لە گۆڕستانی کارگەی قیر لە باشووری شاری هەولێر بەخاك سپێردرا.

گوڵان-ئاسۆ كاكەیی