زۆرجار ئافرەتان لە كۆمەڵگە نەریتییەكان بە نابەدڵ دەستبەرداری بەرژەوەندییە كەسییەكانی خۆیان دەبن و، لە كۆتاییشدا باجی قورس دەدەن. گەڵا یوسف كچێكی تەمەن 46 ساڵەی دانیشتووی شاری كۆیەیە و لە ئێستادا لە یەكێك لە فەرمانگەكانی شاری كۆیە فەرمانبەرە و لە خانوویێكی بەكرێدا بە تەنیا ژیان دەكات. لە گفتوگۆیەكی لەگەڵ گۆڤاری گوڵان بە ناوێكی خوازراو پەردە لەسەر دیوە شاراوەكەی ژیانی لادەدات و بەمجۆرە باسی ڕابردووی ژیانی خۆی بۆ خوێنەران دەكات.

 

گوڵان: كۆمەڵایەتی

 

«من كچی بچووكی ماڵەوە بووم. خوشك و براكانم هاوسەرگیریان كرد و چوونە سەر ماڵ و حاڵی خۆیان، تەنیا من لەگەڵ دایك و باوكە پیرەكەم مامەوە، كاتێك گەیشتمە تەمەنی پێگەیشتن و دوای تەواوكردنی قۆناغی ئامادەیی داخوازی و خوازبێنیكارم هەبوون، چەندین كەس هاتنە داوام، بەڵام هاوسەرگیریم نەكرد. تەنانەت لە سەردەمی خوێندنی زانكۆ و دوای تەواوكردنی خوێندنیش چەند كەسی دیكە پێشنیاری هاوسەرگیرییان بۆ كردم، كەچی بە هۆی تانەلێدانی خوشك و براكانم هەموو خوازبێنیكەرەكانم ڕەت دەكردنەوە، تەنانەت دایكیشم گاڵتەی بە كەسەكان دەكرد و دەیگوت: دیارە نانت لەسەر سێڵ سووتاوە، ئەوەندە پەلە پەل دەكەیت؟ دواجار كوڕێكی مامۆستا هاتە داوام، زۆرم بە دڵ بوو، بەڵام براكەم ڕێگری كرد و گوتی: ئەوە لە ئاستی ئێمەدا نییە. ساڵان هاتن و تێپەڕین و تەمەنم هەڵكشا. لەم ماوەیەدا باوكم نەخۆشییەكی سەختی گرت و من شەو و ڕۆژ لە ماڵ و لە نەخۆشخانە لەسەر سەری وەستابووم. چەند ڕۆژێك پێش ئەوەی بمرێت، ڕۆژێك دەستی گرتم و بە زمانێكی پچڕ پچڕ پێی گوتم: كچە باشەكەم گەردنم ئازاد بكە. منیش دەستیم ماچ كرد و بە قوڕگی پڕ لە گریان پێم گوت: بابە گیان تۆ گەردنی من ئازاد بكە. سەرەتا بابم و دواییش دایكمم لە دەست دا، ئەو خانووەی تێیدا دەژیاین، دوای چەند مانگێك لە كۆچی دایكم خوشك و براكانم كۆبوونەوە و گوتیان دەیفرۆشین و بەشی خۆمانمان دەوێت، زۆر دڵتەنگ بووم، پێم گوتن: ئەی من بە تەنیا بۆ كوێ بچم؟ پێیان گوتم: هەفتەی لای یەكێكمان بمێنەرەوە، تەنانەت یەكێك لە خوشكەكانم پێی گوتم: ئەگەر تۆش وەك ئێمە زوو هاوسەرگیریت بكردبا، ئێستا لەگەڵ هاوسەر و منداڵەكانت دەژیایت و تەنیا نەدەبوویت، لە كاتێكدا هەر كاتێك خوازبێنیم دەهات گاڵتەیان بە كەسەكە دەكرد و جارێك دەیانگوت: لووتی زلە و جارێك دەیانگوت: سەری كەچەڵە و یان دەیانگوت: عەشایەر و دنیانەدیدەن. دواجار بە براكانم گوت من بەشە میراتی خۆم دەدەمە ئەو كەسە كە ڕێگەم بدات تاسەر لەگەڵیدا بمێنمەوە، بەڵام بێدەنگ بوون و خۆیان لەو باسە دزییەوە، لە كۆتاییدا خانووەكە فرۆشرا و منەتی كەسیانم هەڵنەگرت و خانوویێكم بە كرێ گرت، سەرەتا براكانم ناڕەزاییان دەربڕی و گوتیان ئابڕوومان دەچێت، تۆ بە تەنیا بژیت، بۆ یەكەمجار لە بەرانبەریان وەستامەوە و پێمگوتن ئیدی بە قسەی كەستان ناكەم، بەرژەوەندییەكانی خۆم لەكوێ بێت، شوێنیان دەكەوم، دواجار بڕیارێكی دروستم دا. ئەگەرچی زۆر درەنگیش بوو، بەڵام گرنگ وەكو ڕابردوو تەسلیم نەبووم و دەنگی كپكراوی ناخم هەڵبڕی، ئەمڕۆش تەمەنم خەریكە لە پەنجا ساڵی نزیك دەبێتەوە، ئەگەرچی نەمتوانی خانە و لانەیەكی گەرم بۆ خۆم دەستەبەر بكەم، بەڵام بەردەوام لە كاری خۆبەخشی بەشدار دەبم و دڵخۆشم یارمەتیی كەسانێك دەدەم كە ئامانجی گەورەیان هەیە و بۆ گەیشتن بە ئامانجەكانیان دەستیان بەرنادەم.