یەکێتیی پێگەی جەماوەری حەقیقی لە کەرکووک لەدەستداوە، بەهۆی کۆمەڵێک ڕێگەی ناڕێک و دوور بنەماکانی پرۆسەی دیموکراسی ئەنجامەکانی بەدەستهاتن، بەهەرحاڵ ئەنجامەکان هەرچۆنێک بن، جێگەی گومانی ناوخۆیی و جیهانیی بوو، تەنانەت ئەنجامەکان بەهیچ شێوەیەک نەبوونە جێگەی بایەخی نوێنەرانی نێودەوڵەتی لە عێراق و وڵاتانی دیکەی جیهان، چونکە ڕوون و ئاشکرا دیار بوو، دەستکاریکراوبوو.

تۆمەتەکانی یەکێتیی

یەکێتیی لە کەرکووک، لە دانوستاندن و گفتوگۆ شکستیهێناوە، چونکە لەماوەی ڕابردوودا، ئەوەی یەکێتیی بە کەرکووکی کردبێت، خراپە و چەواشەکاریی بوو، تێکدانی بارودۆخی شار و گەیاندنی کەرکووک بوو بەم دۆخەی ئێستا، ئەوەی سەیرە، یەکێتیی کەوتۆتە تەخوین و بڵاوکردنەوەی هەواڵی چەواشەکارانە و بانگەشەی ناڕاست سەبارەت بە ڕێڕەوەکانی پێکهێنانی ئەنجوومەنی پارێزگای کەرکووک.
گرفتی یەکێتیی لە کەرکووک ئەوەیە نازانێت، سیاسەت بکات، سیاسەتێکی پۆپۆلیزیمانەی قێزەون پەیڕەو دەکات، کە دژی بنەماکانی تەوافق و لێکتێگەیشتنە، وەکو دەوترێت؛ ئەوەی یەکێتیی لە خۆیدا مەوجوودە ئاراستەی بەرانبەرەکە دەکات.

بۆ نموونە؛ یەکێتیی نازانێت دانوستاندن بکات، چونکە باوەڕی بە ڕێککەوتن نییە لەسەر بنەمای شەراکەت، بەڵکو باوەڕی بە تەسلیم کردن و بەدەوەستدانی هەموو شتێک هەیە لەپێناو بەرژەوەندی خۆیدا، هەر ئەوەش شاری کەرکووکی گەیاندە ئەم دۆخەی کە پێکهێنانی ئیدارەی خۆجێی شارەکە ئەستەم بێت.
جگە لەوەش یەکێتی لە نەینەوا کە لەوەتەی هەیە، ناتوانێت سەنگ و پێگەی هەبێت لەم ناوچانە، سازان و شەراکەتی پشتگوێخست و چووە نێو ڕێککەوتنێک کە لە ئەساسدا بەتاڵە، بەوپێیەی یەکێتیی ئەوەی دەیکات بە دەنگ و ئیستحقاقی خۆی نییە بەڵکو بە پاڵپشتی ئەو هێز و لایەنە سیاسیانە کە دەیانەوێ دۆخی نەینەوا و دەشتی نەینەوا بۆ بەرژەوەندی خۆیان بەکاربهێنن، یەکێتیی لەوێشدا تووشی سەرلێشێواوی بوو.

یەکێتیی هۆکاری سەرەکیی خراپی دۆخی کەرکووکە

ئەوەی لە ماوەی ڕابردوودا دوای خیانەتی 16ی ئۆکتۆبەر لە کەرکووک ڕووی داوە، سڕینەوەی بنەماکانی پێکەوەژیان و تەوافق و سازان و شەراکەت بووە یەکێتیی کە بەرپرسیارە لە گەیاندنی ڕەوشی کەرکووک بەم دۆخەی ئێستا و گۆڕانی دیمۆگرافیای شارەکە، پارتی مەبەستیەتی داهاتووی کەرکووک، ئاوەدانی و سەقامگیری و گۆڕانکاریی گەورەی پێوە دیار بێت، شارەکە لەڕووی ئەمنییەوە ئارام و پڕ تەناهی بێت، داگیرکاری و تەعریب نەمێنێت کە ئەمەش ڕێک پێچەوانەی سیاسەتی یەکێتییە لە کەرکووک.

هەر ئەو لایەن و کەسانەی کە بوونە هۆی شێواندنی دۆخی شاری کەرکووک و شارەکەیان تووشی داگیـرکاری و ناسەقامگیری کرد، ئێستا بە بەخشینەوەی تۆمەتی بێبنەما و بڵاوکردنەوەی ناڕاست دەرهەق بە کەرکووکییەکان دەیانەوێت ڕووی ناشرینی خۆیان سپی بکەنەوە، بەڵام ڕاستییەکان دیارن و گەلی کوردستان و پێکهاتەکانی شاری کەرکووک شاهێدی تێگەیشتن و سیاسەتی ڕوونی پارتیین.

تۆمەتە ناڕەواکان پووچەڵ دەبنەوە

لە ماوەی هەوڵدان بۆ پێکهێنانی ئیدارەی خۆجێی کەرکووک، چەندین تۆمەتی ناڕەوا و بێبنەما، ئاراستەی پارتی دیموکراتی کوردستان کراون، سەبارەت بە دانانەوەی پارێزگاری سەپێندراوی ئێستای کەرکووک، بەڵام ئەوەی لای هەموان ڕوون و ئاشکرایە، هەڵوێستی پارتی دیموکراتی کوردستانە بۆ دانانی پارێزگاری کەرکووک، پارتی بەردەوام لەگەڵ ئەوە بووە، کە پارێزگارێکی کوردی نیشمانپەروەر و قبووڵکراو لەلای پێکهاتەکانی کەرکووک دابنرێت، کە بەوپەڕی عەقڵانییەت و تێگەیشتن، سیاسەت بکات.

کۆبەند

ئەنجامی گفتوگۆ و دانوستاندنەکان بگەنە هەر ئاستێک و دەرەنجامەکانی هەرچۆنێک بن پارتی دیموکراتی کوردستان، بەردەوامە لەسەر هەڵوێست و سیاسەتی لەمێژینەی خۆی بۆ ئایندەی کەرکووک، ئەوەش لەگەڵ هەموو ڕێگەیەکی یاسایی و شەرعی یەکگر، هەروەها لەگەڵ بنەما نیشتمانییەکانی گەلی کوردستان لە کەرکووکیش.

ڕەنگە هەر ڕێککەوتنێکی پارتی دیموکراتی کوردستان لەگەڵ هەر لایەنێک گەر بیکات بۆ لایەنەکانی بەرانبەری قورس بێت، چونکە پارتی داخوازییەکانی بە نسبەت بەرانبەرەکانی سانا نین، پارتی دەیەوێت مافی هەموو پێکهاتەکان لە کەرکووک پارێزراو بێت، پارسەنگی هێز لە بەرژەوەندیی هەموو لایەک بێت.
بۆ مێژوو؛ (پارتی هەرگیز ناچێتە نێو ڕێککەوتنێکەوە کە بە دەستەوەدانی خاکی باب و باپیری لەمێژینەی نەتەوەیەک بێت، بەڵکوو زامنی سەقامگیری و پاراستنی مافەکانی گەلی کورد و کەرکووکیە رەسەنەکانی لەگەڵدا دەبێت)