مارتن گریفیتس، یاریدەدەری سکرتێری گشتی و سەرۆکی دەزگای فریاگوزاری و کارەکانی نەتەوە یەکگرتووەکان هۆشداریدا لەوەی تا ناوەڕاستی مانگی تەمموز زیاتر لە یەک ملیۆن کەس لە کەرتی غەززە ڕووبەڕووی مردن و برسێتی ببنەوە.

گریفیتس پەیامێکی ئاراستەی گروپی حەوت وڵاتەکەی کرد و ئاماژەی بەوەدا کە سبەی نوێنەرانی ئەو وڵاتانە لە ئیتاڵیا کۆدەبنەوە، هەروەها هۆشداریشیدا لە پەرەسەندنی ململانێکان لە سودان و غەززە و ناوچەکانی دیکەی جیهان.

لە پەیامەکەیدا لەسەر ئەم بابەتە نووسیویەتی: نیوەی خەڵکی غەززە کە زیاتر لە یەک ملیۆن کەسە، تا ناوەڕاستی مانگی تەمموز ڕووبەڕووی مەترسی مردن و برسێتی دەبنەوە.

هەروەها مارتن گریفیتس جەختی لەوە کردەوە کە ٥ ملیۆن کەس لە سودان لە لێواری برسێتیدان.

لە بەشێکی دیکەی پەیامەکەیدا ئاماژە بە ڕێگریکردن لە چالاکیی فریاگوزاری لە غەززە و سودان جەختی کردەوە: دەبێت ئەم دۆخە بگۆڕدرێت. نابێت تەنانەت یەک خولەکیش لەدەست بدەین.

 

 

گوڵان: سەردار خەلیل