کەوتنەخوارەوەی فڕۆکەی مەشقی سەربازیی تورکیا بووە هۆی گیانلەدەستدانی دوو کەس.
فڕۆکەیەکی مەشقی سەربازیی تورکیا کەوتە خوارەوە
وەزارەتی بەرگری تورکیا ڕایگەیاند، ڕۆژی سێشەممە فڕۆکەیەکی مەشق و ڕاهێنانی سوپای ئەو وڵاتە لە پارێزگای قەیسەری ناوەندی وڵات کەوتە خوارەوە و لە ئەنجامی ئەم ڕووداوەدا دوو سەرباز گیانیان لەدەستدا.
ئەم وەزارەتە ڕایگەیاند، فڕۆکەی مەشقی SF-260 D لەگەڵ دوو فڕۆکەوان بۆ مەشق و ڕاهێنان لە بنکەی ئاسمانی قەیسەری هەڵفڕی و بە هۆکارێکی نادیار کەوتە خوارەوە.
وەزارەتەکە ئاماژەی بەوەشکردووە، تیمی فریاگوزاری ڕەوانەی شوێنی کەوتنەخوارەوەی فڕۆکەکە کراوە و بۆیان دەرکەوتووە کە هەردوو فڕۆکەوانەکە لە ڕووداوەکەدا گیانیان لەدەستداوە.
گوڵان: سەردار خەلیل
