مـــەســرور بارزانی، سەرۆكی حكوومەتی هەرێمی كوردستان، پەیامێكی بە بۆنەی ساڵیادی ڕێككەوتننامەی یازدەی ئادار بڵاو كردەوە
![مـــەســرور بارزانی، سەرۆكی حكوومەتی هەرێمی كوردستان، پەیامێكی بە بۆنەی ساڵیادی ڕێككەوتننامەی یازدەی ئادار بڵاو كردەوە](https://gulanmedia.com/public/images/posts/20240311112512_original_20.jpg )
ئەمڕۆ دووشەممە 11ی ئاداری 2024، مەسرور بارزانی، سەرۆكی حكوومەتی هەرێمی كوردستان، پەیامێكی بە بۆنەی ساڵیادی ڕێككەوتننامەی یازدەی ئادار بڵاو كردەوە و تێیدا جەختی لە پێویستی و گرنگیی پاراستن و ڕێزگرتن لە مافە دەستوورییەكانی گەلی كوردستان كردەوە. ئەمەش دەقی پەیامەكەیە:
*پەیامی سەرۆکی حکومەتی هەرێمی کوردستان لە ساڵیادی ڕێککەوتننامەی یازدەی ئادار
ئەمڕۆ پەنجا و چوار ساڵ بە سەر ڕاگەیاندنی ڕێککەوتننامەی یازدەی ئاداری 1970 تێدەپەڕێت کە دەستکەوتێکی مێژوویی شۆڕشی مەزنی ئەیلوول بوو بە ڕابەرایەتی بارزانیی نەمر.
شۆڕش و خۆڕاگری و قوربانیدانەکانی گەلی كوردستان، حکوومەتی ئەوکاتی عێراقی ناچار کرد دان بە بەشێک لە مافە ڕەواکانی گەلی کوردستاندا بنێت. بە تایبەتی ڕێککەوتن لە سەر هەموارکردنەوەی دەستووری کاتی و داننان بەوەی عێراق لە دوو نەتەوەی سەرەکی (عەرەب و کورد) پێکهاتووە و دەستووریش دان بە مافە نەتەوەییەکانی گەلی کورد دەنێت.
بەڵام دواجار ڕژێمی ئەو سەردەمەی عێراق، لە ڕێککەوتننامەکە پاشگەز بووەوە و پەنای بردەوە بۆ شەڕ و دژایەتیکردنی خەڵکی کوردستان و سەرەنجام عێراقی دووچاری ماڵوێرانی و کارەساتی گەورە کرد کە تا ئێستاش خەڵکی عێراق، باجەکەی دەدەن.
لەم یادەدا ، جەخت لە پێویستی و گرنگیی پاراستن و ڕێزگرتن لە مافە دەستوورییەکانی گەلی کوردستان و قەوارەی دەستووری هەرێمی کوردستان دەکەینەوە. خەڵکی کوردستان هەرگیز ڕێگە نادات مافەکانی پێشێل بکرێت و ستەم و زۆرداری لێ بکرێت و عێراق بگەڕێنرێتەوە بۆ سەردەمی دیکتاتۆری و تاکڕەوی.
مەسرور بارزانی
سەرۆکی حکومەتی هەرێمی کوردستان
2024/3/11