لە هێرشەکانی شەوی ڕابردووی سوپای ئیسرائیل لە ناوچە جیاجیاکانی کەرتی غەززە زیاتر لە ١٠٠ فەلەستینی کوژران و ژمارەیەکی زۆریش بریندار بوون.

سوپای ئیسرائیل شەوی ڕابردوو بە هێرشی ئاسمانی و زەمینی ناوچە جیاجیاکانی کەرتی غەززەی کردە ئامانج. لە ئەنجامی ئەم هێرشانەدا زیاتر لە ١٠٠ فەلەستینی گیانیان لەدەستدا و ژمارەیەکی زۆریش بریندار بوون.

بە پێی ڕاپۆرتی هەواڵدەریی فەرمیی فەلەستینی "وەفا"، لە ئەنجامی بۆردومانی ماڵێک لە گەڕەکی دەرج، ٥٠ کەس گیانیان لە دەست دا. تەرمەکان گواستراونەتەوە بۆ نەخۆشخانەکانی شیفا و ئەلئەهلی باپتیست.

بەهۆی هێرشی تۆپخانە بۆ سەر گەڕەکی زەیتون و سەبرا 5 کەس کوژران و 10 کەسیش بریندار بوون.

هەروەها گەڕەکەکانی شێخ عەجلین و تل ئەلحەوا لەلایەن یەکەکانی تۆپخانە و بەلەمە مووشەک هاوێژەکانی ئیسرائیلەوە کرانە ئامانج.

لە ئەنجامی هێرشی هێزەکانی ئیسرائیل بۆ سەر ماڵێک لە ناوچەی سوارحا، ٣ کەس کوژران و ٦ کەسیش لە کەمپی پەنابەرانی بوریج و ئەلمەغازی کوژران. هەروەها تەرمی ئەو کەسانە بۆ نەخۆشخانەی شەهیدانی ئەقسا لە دێربەلیح گواستراونەتەوە.

هەروەها هێزەکانی ئیسرائیل ماڵێکی دیکەیان لە خان یونس کردە ئامانج و زیاتر لە 30 کەسیان کوشت کە ژن و منداڵیشیان تێدابوو.

لە دەوروبەری سنووری میسر، خانوویەک و ئۆتۆمبێلێک، کە زۆربەی سەرنشینەكان ئاوارە بوون، لەلایەن فڕۆكە جەنگییەكانی ئیسرائیلەوە کرانە ئامانج، كە بەلانیکەم ٢٣ کەس گیانیان لەدەستدا.

 

 

 

گوڵان: سەردار خەلیل