بەهۆی باران بارین و زریان ولافاو کە لە پارێزگای ئۆکیناوا لە باشووری ژاپۆن ڕوویدا، کەسێک گیانی لەدەستدا و ١١ کەسیش برینداربوون.

پیاوێکی تەمەن ٩٠ ساڵ کە لە ژێر گەراجێکی داڕماودا لە ئۆکیناوا گیری خواردبوو، دوای گەیاندنی بە نەخۆشخانە گیانی لەدەستدا.

ڕێکخراوی ئاگرکوژێنەوە و بەڕێوەبردنی کارەساتەکانی ژاپۆن ڕایگەیاند، بەهۆی زریانەکەوە ١١ کەس برینداربوون.

هەروەها بەڕێوەبەرایەتیی کارەبای ئۆکیناوا ڕایگەیاند: کە زریانەکە بووە هۆی پچڕانی کارەبای ٢١٠ هەزار ماڵ لەم پارێزگایە.

هەروەها گەشتە ئاسمانییەکانی ناوچەکە بەهۆی لافاوەوە ڕاگیران.

بەرپرسانی پارێزگای ئۆکیناوا هۆشدارییان بە دانیشتوانی پارێزگای ئۆکیناوا دا بەهۆی باران بارینێکی زۆر و لافاو و گەردەلول ، داواشیان لە هاووڵاتییان کرد کە جگە لە حاڵەتی لەناکاو لە ماڵەکانیان دەرنەچن.

 

 

 

گوڵان: سەردار خەلیل