حکومەتی هەرێمی کوردستان، هەرچی قورسایی کاری خۆی بخاتە خزمەت بیناکردنەوەی ئەو عێراقە داتەپیوە و بەهەر فۆڕم و نۆڕمێک ڕێکبکەوێت و داخوازیەکانیان جئ بەجئ بکات، هێشتان عێراق پابەند نابێت!.
چون لە دوای ٢٠٠٣ ئێران بە پیلانێکی وردو دارێژراو عێراقی دەرگیری شەڕێکی تائیفی و ئەهلی قورس کرد، لەو چوارچێوەیەدا پێکهاتەی سووننە تەسفیە و کەنارگیرکرا و ناوچەی سووننەنشین بووە مەیدانی یەکلاکردنەوەی شەڕێکی لە مێژینەی مەزهەبیی و پڕۆسەی تۆڵەسەندنەوەیەکی کوێرانە، بەو هۆیەوە پارێزگاکانی ناوچەی سووننە بوونە پارچەیەک ئاگر کە تا ئێستاش گڕی ئەو ئاگرە خامۆش نەکراوەتەوە، پێچەوانەی ئەوە لە ژێر ڕۆشنایی و سیاسەتی حەکیمانەی سەرۆک بارزانی پارێزگاکانی کوردستان لە ئاسایش و ئاوەدانی و پێشوەچوونی بەردەوام دابوون.

بمانەوێت یان نا :- ئەمڕۆ بە هاوکاریی کۆماری ئیسلامی ئێران، شیعە لە عێراق حکوم دەکات، بۆ ئێمەی کوردیش هیچ رێگەیەک نەماوەتەوە، یان رادەستبوون بە ئەجیندای ئێران، یان کشانەوە لە پرۆسەی سیاسیی لە عێراق، کە بژاردەی دووهەم لە بەرژەوەندیمانە، بەڵام لە کشانەوەو پەکخستنی پرۆسەی سیاسیی دا زۆر سست و لاوازین چون بەشێک لە لایەنەکانی سیاسی هەرێمی کوردستان لەبەرەی شۆڤێنەکانی عێراقدان دژ بە گەل و قەوارەی هەرێمی کوردستان. ئەوەش هۆکارە کە نێوەخۆی هەرێمی کوردستان پەرش و بڵاو بێت و گووتارێکی یەکگرتوو نەبێت بۆ مامەڵەکردن و رووبەرووبوونەوە لەگەڵ قۆناغەکەدا.

گرفتەکانیش کە رووبەرووی هەرێم دەکرێنەوە سیاسین و یاسایی نین بەهیچ جۆرێک، بە نموونە:- بە گوێرەی ماددەی 141 دەستووری هەمیشەیی عێراق مافدراوە بە ئەنجوومەنی نیشتمانی کوردستان سەربەخۆ و بێ گەڕانەوە بۆ ڕا و بڕیاری حکوومەتی فیدراڵی عێراق گرێبەستی نەوتیی یان هەر سامانێکی تری سروشتی واژۆ بکات لەگەڵ کۆمپانیا نێوخۆیی و دەرەکییەکاندا، خۆ پێش ئەو بەندە دەستوورییە و روخانی رژێمی عێراقیش لە میانەی پرۆسەی ئازادکردنی لە ساڵی 2003، حکوومەتی هەرێمی کوردستان چەند بۆندێکی مۆر کردبوو لەگەڵ ژمارەیەک کۆمپانیای بیانی بە مەبەستی دەرهێنانی نەوت لە کوردستان، هەر لە ژێر رووناکی و رەوایی ئەو بڕگە دەستوورییەشدا بە ئەندازەیەکی بەرفراوان گرێبەستی نەوتیی لەگەڵ چەند کۆمپانیای لۆکاڵی و دەرەکی واژۆ کران بۆ دەرهێنانی نەوت و گرفتێکیش لە ئارادا نەبووە.
لەوان ساڵانی دواییدا، حکومەتی هەرێمی کوردستان بۆ پاراستنی قەوارەو گەلەکەی ڕازی نەبووە بچێتە بەرەی مقاوەمەتی ئێران، ئێران پانای برد بۆ بڕینی بەشە بودجەی کوردستان و دەیان گووشارو کارتی جۆراوجۆری، تەنانەت دادگای فیدراڵیشی بەکارهێنا بۆ بە نایاسایی کردنی غازو نەفت و دەستبەسەرداگرتنی نیوەی داهاتی نانەوتی هەرێمی کوردستان!.

واقیع ئەوەیە: ١٧ ساڵ بەر لە ئێستا ٩ـی ٩ـی ٢٠٠٦ کاتێک حکومەتی هەرێمی کوردستان پڕۆژەی یاسای نەوت و غازی راگەیاند و لە مانگی ئۆگۆستی ٢٠٠٧ پەرلەمانی کوردستان پڕۆژە یاساکەی پەسەند کرد. کە بەپێی دەستووری حکوومەتی عێراق ئەو مافەمان هەبوو، دەستکرا بە بنیاتنان و سەرپئ خستنی ژێرخانی نەفت، هێزێکی سیاسیی بە دوای خۆیدا هێناو ڕۆژ دوای ڕۆژ هەرێمی کوردستان پێشکەوتنی زۆرتری ئابووری و سیاسی بەدوای خۆیدا هێنا. پێچەوانەی هەرێمی کوردستان، عێراق بەهەموو شێوەیەک سەقامگیریی لە دەستدا و بەردەوام حکوومەتەکانی عێراق بەوەی ئێستای سودانیشەوە، سەرقاڵی جەنگ و شەڕی ناوخۆیی و دەرەکیی و بەتاڵان بردنی سامانی وڵات بوون و ڕۆژ بۆ ڕۆژ پاشەکشێی ئابووری و سیاسی بەخۆیەوە بینی.
کورت و پوخت ئەوەیە:- هەر کاتێک بینیتان حکوومەتی عەرەبیی عێراق پەنجەرەیەک بە رووی کوردستاندا بکاتەوە، گومانتان نەبێت کە دەیان دەرگای گەورە گەورەی لەسەر داخستووین، ئەم راستییەش بەسە بۆئەوەی حوکم بدەین لەسەر حکومەتی عێراق کە نایەوێت بەهیچ شێوەیەک کورد خاوەنی سەروەری خۆیی بیت و باپەندی هیچ ڕێککەوتنێکیش نابێت. بڕو بیانوویەکانی عێراق بۆ نەناردنی بەشە بودجەی هەرێمی کوردستان، سەرەرای ئەو رێککەوتنە کۆنکرێتیەی لە نێوان هەردووک حکومەت کراوەو هەرێم پابەندی تەواوی برگەو خاڵەکانی رێککەوتنەکەیە، جگە لە نیشاندانی کینەی خۆڕسک و قینی پەنگخواردووی هەندێک لە شۆڤێنیەکانی حکومەتە یەک بەدوای یەکەکانی بەغداد و فشارەکانی ئێران بەرانبەر بە کوردستان، هیچ شتێکی تر نییە.
جۆرێکیشە لە قارسکردنی بودجەی عێراق و داشکاندنی رێژەی پارەی عێراق و کەڵەکەکردنی کەموکوڕیی زیاتر لە بودجەی عێراق تا شەلەلێکی گەورەتر و درزێکی بەرینتر لە ئابووری داتەپیوی عێراقدا دروست ببێت، ئەمە گەمەیەکی بەردەوامە عەرەبە شیعیەکانی عێراق بە پاڵپشتی ئێران بە مەبەستی ڕاکێشانی کوردستان بۆ ناو بەرەی مقاوەمەتی ئێران، یان تەنازولپێکردنی زیاتری کوردستان لە ماف و ئازادییەکانی پەیڕەوی دەکەن.