لەچوارچێوەی بەهێزکردنی بەرگریی سوپاکەی، کوێت ئەنجامدانی گرێبەستێكی لەگەڵ تورکیا بۆ کڕینی فڕۆکەی بێفڕۆکەوانی " بایراكدار TB2 " بە بەهای 367 ملیۆن دۆلار ڕاگەیاند.

وەزارەتی بەرگریی کوێت و کۆمپانیای "بایکار"ی تورکیا لە دوو بەیاننامەی جیادا ئەنجامدانی ئەم گرێبەستەیان ڕاگەیاندووە.

بەگوێرەی ئەو لێدوانانە، "  بایراكدار TB2 " لە مانگی تەمموزی 2019 لە وڵاتی کوێت تاقیکرایەوە و ژمارەیەکی پێوانەیی بەدەستهێنا کە 72 کاتژمێر و 3 خولەک فڕینی بێ وەستان بوو لەژێر بارودۆخی کەشوهەوای سەختی وەک پلەی گەرمی بەرز و با و زریانی خۆڵدا.

گرێبەستی کڕینی فڕۆکەی بێفڕۆکەوان لە نێوان کوێت و تورکیا بە شێوەیەکی ڕاستەوخۆ و بەبێ نێوەندگیری ئەنجامدرا.

بەگوێرەی میدیاکانی تورکیا، لەگەڵ تەواوبوونی ئەم گرێبەستە، کوێت 30هەمین وڵاتە کە لەگەڵ کۆمپانیای "بایکار" ڕێککەوتووە بۆ بەدەستهێنانی فڕۆکەی بێفڕۆکەوانی "  بایراكدار TB2 ".

 

 

گوڵان: سەردار خەلیل