لە ئەمریکا توندوتیژی چەکداری و کوشتن بە چەکی ئاگرین بەربڵاوە و لە سەرەتای ئەمساڵەوە تا ئێستا ١٧ هەزار و ٧٣٧ کەس گیانیان لەدەستداوە.

ئەمڕۆ ڕۆژی "هۆشیاری توندوتیژی بە چەکی ئاگرین"ە لە ئەمریکا و بەداخەوە کارەساتی توندوتیژی چەکداری و کوشتن بە چەکی ئاگرین لەم وڵاتەدا زۆر زیادی کردووە و تەنها لە پێنج مانگی یەکەمی ئەمساڵدا ١٧ هەزار و ٧٣٧ کەس گیانیان لەدەستداوە، وە ١٤ هەزار و ٧٢٣ کەس بریندار بوون.

لە ماوەی ٥ مانگدا ١١٣ منداڵی  نێوان ٠ بۆ ١١ ساڵ و ٦٤٢ منداڵی نێوان ١٢ بۆ ١٧ ساڵ بوونەتە قوربانی توندوتیژی چەکداری لە ئەمریکا.

هەروەها ١٨٩٤ منداڵ بەهۆی توندوتیژی چەکدارییەوە بریندار بوون.

بەهۆی توندوتیژیی چەکداری پۆلیسەوە 587 کەس گیانیان لەدەستداوە و 361 کەسیش برینداربوون.

بەپێی داتاکانی ئەرشیفی توندوتیژی بەدەمانچەی ئەمریکا، لە ساڵی ٢٠٢٢دا ٤٤ هەزار و ٣٦٢ کەس لە ئەنجامی توندوتیژی بە دەمانچە کوژراون کە هەزار و ٦٨٣یان منداڵ بوون و ٣٨ هەزار و ٥٩٢ کەسیش بریندار بوون.

ئەرشیفی توندوتیژی پێوەرەکانی نووسینگەی لێکۆڵینەوەی فیدراڵی (FBI) بەکاردەهێنێت بۆ پێناسەکردنی "هێرشی چەکداری بەکۆمەڵ". لەسەر بنەمای ئەمەش هێرشە چەکدارییەکان کە لانیکەم ٤ کەس جگە لە هێرشبەرەکە گیانیان لەدەست دەدەن، بە "هێرشی چەکداری بەرفراوان" دادەنرێت.

 

گوڵان: سەردار خەلیل