سەرۆک نێچیرڤان بارزانی سەرۆكی هەرێمی كوردستان لە رێوڕەسمی 43یەمین ساڵیادی شەهیدكردنی محەممەد باقر سەدر لە بەغداددا وتارێکی زۆر راست و دروستی خوێند بۆ سازانی كۆمەڵگەی كوردستان و گەلانی تری عێراقی و لێکترنزیکبوونیان و پێکەوە کارکردن لە چوارچێوەی عێراقدا.

مادام زەمینە لەبار نیە بۆ ڕاکێشانی کارتی ڕێفراندۆم و پرسی سەربەخۆیی، پارتی واقیعیانە لە گەڵ قۆناغەکە مامەڵە دەکات و وەک گەورەترین حزب لە عێراق، پەیوەندیەکانی لەگەڵ کۆی حزب و مەرجەع و لایەنی سیاسی عێراقی و هەتا وڵاتانی هەرێمیش پتەوترو بەهێزتر دەکات لە پێناو کوردستانێکی بەهێزترو سەلامەتتر لەداهاتوودا. ئێستا پارتی بەودەرئەنجامە گەیشتووە هەر لایەنێک ڕێگری بکات لە پێشکەوتنی یەکڕیزی نێوەخۆیی و تێکدانی سەقامگیری هەرێمی کوردستان و حکومەتەکەی ئاقیبەتی شکست و شکانی خۆیەتی، بۆیە هەمووکات دەستی تەبایی و ئاشتی و پێکەوەیی بۆ هەموو لایەنەکان درێژدەکات. گرینگیشە هەموو لایەنەکان لە ئاستی بەرپرسیارێتی نیشتیمانی و نەتەوەییدابن و دەستەجەمعی بەشداری پلان و کارنامەی سەرۆکایەتی هەرێمی کوردستان و سەرۆکایەتی ئەنجومەنی وەزیرانی هەرێمی کوردستان بکەن بۆ کوردستانێکی بەهێز لە چوارچێوەی عێرقدا.

دواجار هەر دەبئ ئینتیمای نیشتیمانی و نەتەوەیی لە ناو لایەنە سییاسیەکان و کۆمەڵگە ڕێکبخرێتەوە تا ئاستێکی زۆر باشیشی ببەن، ئەگەر بێت و وانەبێت ئەوا کەشتیەکەمان لە مەحاڵدا ڕئ دەکات و هەمووشمان لە کەشتیەکەداین بئ جیاوازی!.
بێگومان ئەگەر بێت و واشبێت، ئەوسا ئاستەنگ و مەترسی و گەلەکۆمەیەکیش لە ئارادابێت لە بەردەم پێشکەوتن و ئیرادەی نەتەوەیی و کوردستانیدا لەبەین دەبرێت و پێکەوەیی بەهێزترمان دەکات. کەوایە پارتی گەرەکیەتی پرۆژەی نەتەوەیی لە عێراقدا پێش بخات و کەس نەتوانێت ڕێگری لەبەرفراوانبوون و بتەوبوونی بکات و پەیامی یەکبوون و یەکڕیزی حزب و لایەنەکانیشی چپاندووە بەگوێی هەموویاندا.

ئەرکی پارتی لە هەموو قۆناغەکاندا پاراستنی شوناس و ناسنامەی نەتەوەیی و کوردبوونمان بووە، لە ڕابردوو و لە ئێستاشدا، تەنیا حزب بووە کە هەستی بە ئێشی نیشتیمان کردووە، بەڵام گرینگە لایەنەکانی تری کوردستانیش لە ئاستێکی بەرزتردا گرێدراوی هاوبیری نەتەوەیی و نیشتیمانی پارتی بن. دەبئ هەوڵبدرئ ئاستی حزبگەرایی تێپەڕبکەین و شوناسی نەتەوەییمان دیاری بکەین و دواتریش بگەینە شوناسی مرۆڤایەتیمان، ئەوەنە یەکدی ڕەت ناکەینەوەو هەوڵی لەبەین بردنی دەستکەوتەکانمان نەدەین، چون ئەو مۆدێلە سیاسی و سەرکردایەتیکردنەی پارتی پێشکەشی دەکات، نەتەوەبوونی کورد لەئاستی هەرەبەرز لە چوارچێوەی عێراقدا بە بنەما دەگرێت، پێویستە تەواوی حزب و لایەنەکانی سیاسی کوردستانی هاوبیری پارتی بن و ئەو زهنییەتە پێش بخەن کە بە ڕێکەوتنی نەوت و غاز لە نێوان هەولێرو بەغداد دەستی پێکردووەو پێی چووینەتە قۆناغێکی جیاوازو نوئ.