لە هەنگاوێكی بەرز و پیرۆزدا، تۆڕەكانی پەیوەست بە ڕێكخراوەكان، یان دامەزراوەكانی پەیوەست بە ڕووبەڕووبوونەوەی گەندەڵی، لە هەفتەی ڕووبەڕووبووەنەوەی ئەم دیاردە مەترسیدارەدا، وەك سومبلی دەستپاكی ڕێز لە پڕۆفیسۆر شێرزاد نەجاڕ گیرا، ڕاستییەكەی ئەم هەنگاوە مانای زۆر هەڵدەگرێت، سەبارەت بە مرۆڤێك كە لە تەمەنی (75) ساڵیدا، پڕە لە بەهای مرۆڤایەتی و نیشتمانی و نەتەوەیی و دڵسۆزی و پاكی و ئەكادیمیی ڕەسەن.

دەتوانم بڵێم پڕۆفیسۆر دكتۆر شێرزاد نەجاڕ لەسەر ئاستی نیشتمانی و عێراقی و عەرەبی و جیهانی ناسراوە، ماوەیەكی درێژ خۆی بۆ توێژینەوەی ئەكادیمی و خزمەتكردنی دامەزراوەكانی خوێندنی باڵا تەرخان كرد، جگە لەوەی كە لە بزاڤی ڕزگاریخوازیی گەلەكەمان و نیشتمانیی دیموكراسیی عێراقیدا شوێن پەنجەی دیارە. لەسەر ئاستی نێودەوڵەتییش، دكتۆر شێرزاد نەجاڕ پەیوەندییەكی زۆری هەیە لەگەڵ كەسایەتییە ئەكادیمی و نێودەوڵەتییەكان، بەتایبەتیش لەگەڵ وڵاتانی ڕۆژئاوا، بە دیاریكراویش وڵاتێكی وەك نەمسا كە ساڵانێكی زۆر تەمەنی تێدا بەسەر برد، ئەنجامەكەشی ئەوە بوو كە بڕوانامەی دكتۆرای لە زانكۆی ڤیەننا وەرگرت لە بابەتی سیستەمی سیاسیی عێراق، لەژێر دەستی كۆمەڵێك ئەكادیمیستی ناسراوی ئەم وڵاتە كە تیایدا خوێندی، ئەوانیش لە ڕێڕەوی سیاسیی ئەوروپادا ڕۆڵی بەرچاویان هەبوو، بەتایبەتی لە بواری دیپلۆماسی و سیاسەتدا.

دكتۆر شێرزاد نەجاڕ كە لە سەرەتای نەوەدەكانی سەدەی ڕابردوودا گەڕایەوە عێراق، ماوەی (30) ساڵ خۆی بۆ خزمەتی دامەزراوە ئەكادیمییەكان تەرخان كرد، وەك مامۆستا یان لە پۆستە ئیدارییەكان و سەرۆكی بەشی زانستە سیاسییەكان كە خۆی دامەزرێنەری بوو لە زانكۆی سەڵاحەدین، یان یاریدەدەری سەرۆكی زانكۆی سەڵاحەدین بۆ كاروباری كارگێڕی و دارایی، هەروەها ڕاوێژكاری سەرۆكی حكومەت بۆ كاروباری خوێندنی باڵا بۆ چارەكە سەدەیەك، شوێن پەنجەكانی ئەم بەڕێزە بە لێهاتوویی و پاكی و دڵسۆزی و دەستپاكی لە خزمەتكردندا ڕوون و بەرچاوە.

لەژێر دەستی دكتۆر شێرزاد نەجاڕدا ژمارەیەكی زۆر قوتابی لە یاسا و زانستە سیاسییەكاندا پێڕاگەیشتوون، چ لە بواری بەكالۆریۆس یان خوێندنی باڵا(ماستەرو دكتۆرا)، دەتوانم بڵێم نزیكەی (100) نامەی ماستەر و تێزی دكتۆرا بە سەرپەرشتیی ئەو بەڕێزە ئەنجام دراون، نەك هەر لە زانكۆی سەڵاحەدین، بەڵكوو لە سۆران و دهۆك و زانكۆی كوردستان و زانكۆكانی دیكەی هەرێمی كوردستان.

لە ماوەی ڕابردوودا دكتۆر شێرزاد نەجاڕ سەرۆكی دەستەی ئەمیندارانی زانكۆی كوردستان بوو، لە زانكۆی كوردستان كاری كرد و توانی بۆ ماوەیەكی زۆر ئەم زانكۆیە لەسەر ڕێڕەوێكی ڕاست بەڕێوە ببات، ئێستاش كە بەڕێزیان خۆی تەرخان كردووە بۆ نووسین و سەرپەرشتیكردنی نامەو تێزی دكتۆرا لە بواری یاسا و زانستە سیاسییەكان، بۆیە لە ژیاندا هەرگیز مانای ماندووبوون نازانێت و باوەڕی بە نامە پیرۆزەكەی هەیە، ئەوەی جێی باسە دەستنیشانكردنی بەڕێزیان بوو، وەك سومبلی دەستپاكی لەسەر بنەمای پێوەرەكانی دەستپاكی، كە بریتین لەوەی كە ڕۆژێ لە ڕۆژان بۆ بەرژەوەندیی تایبەتیی خۆی سامانی گشتیی تەرخان نەكردبێت، بەڵكو پارێزگاری لە سامانی گشتی كردووە، هەروەها هیچ جار بۆ بەرژەوەندیی خۆی ئەو جێ و پێگەیانەی كە هەیبوو لە بواری فەرمانڕەواییدا بەكاری نەهێناون، بەڵكو كاری كردووە و بە شێوەیەكی ڕێكوپێك ئەنجام بدرێن.

دكتۆر شێرزاد نەجاڕ جێی متمانەی داڕێژەرانی بڕیاری سیاسی بووە، بەتایبەتی لەو ماوەیەی كە لە ئەنجومەنی وەزیراندا كاری كردووە، لە زۆر لە دۆسێ گرنگەكان وەك یەكسانكردنی بڕوانامەكان و وەرگرتنی مەڵبەندی و خوێندنی باڵا و ڕاوێژ لە بواری پەیوەندییەكانی دەرەوەی پەیوەست بە پەیوەندییە ئەكادیمییەكان، زۆر بە دڵسۆزی و لێهاتوویی كاری كردووە و بیروبۆچوونی خۆی خستووەتەڕوو، ڕێزیش لەم بیروڕایانەی گیراوە، لەسەر ئاستی عێراقیش دكتۆر شێرزاد نەجاڕ تۆڕێك پەیوەندیی لەگەڵ بیرمەندان و ڕۆشنبیرانی عێراق هەیە، بەتایبەتی دكتۆر عەبدولحسێن شەعبان و دكتۆر عامر حەسەن فەییاز و عەبدولحسێن روفەیعی و كۆمەڵێكی زۆر لە ئەكادیمیستی نیشتمانی، لەسەر ئاستی عەرەبیش لەگەڵ هەموو ئەو دەوڵەتە عەرەبییانە، بەتایبەتی فەلەستینییەكان و جەزائیرییەكان و توونسییەكان و ئوردنییەكان پەیوەندیی هەیە، تەنانەت لە بواری فەرمیشدا پەیوەندیی هەیە لەگەڵ بەشێك لە داڕێژەرانی سیاسیی ئەم دەوڵەتانەدا، بەتایبەتی لەگەڵ میر حەسەن كە لە وڵاتی ئوردندا كەسایەتییەكی دیار و ناسراوی جیهانی عەرەبی و ئیسلامییە و، بەشداریی زۆری لە چالاكییەكانیدا كردووە.

لەسەر ئاستی هەرێمییش، كە دكتۆر شێرزاد نەجاڕ سەردانی دەوڵەتە ئیقلیمییەكان دەكات، بەتایبەتی كە سەردانی كۆماری ئیسلامیی ئێرانی كرد، بە شێوازێكی دیپلۆماسییانە و لێهاتووانە مامەڵەی لەگەڵ دامەزراوەكانی ئەم وڵاتەدا كرد، بەتایبەتیش لە زانكۆی تاران لە سەنتەری دیراساتی ستراتیژی كە سەنتەرێكی دێرینە و پتر لە (60) ساڵە دامەزراوە، موحازەرەیەكی دەربارەی پەیوەندییەكانی نێودەوڵەتی و كەیسی كورد و بارودۆخ و داهاتووی عێراق پێشكەش كرد، كە جێگەی پێزانینی ئەكادیمیستییانی وڵاتی ئێران بووە.

من كە باسی دكتۆر شێرزاد دەكەم كەسایەتییەكی ئەكادیمیی دیكەی نیشتمانیی عێراق دێتەوە یادم، ئەویش پڕۆفیسۆر دكتۆر عەبدولجەبار عەبدوڵایە (یەكەم سەرۆكی زانكۆی بەغدا) دوای شۆڕشی 14ی تەموزی 1958، دكتۆر عەبدولجەبار عەبدوڵا یەكێك بووە لە چوار قوتابییەكانی زانای ناودار ئیزنشتاین، لە بواری فیزیای ئەتۆمی و لەژێر دەستی ئەو زانایەدا پەروەردە كرا، ئەو بەڕێزە نەك هەر لە عێراق، تەنانەت لەسەر ئاستی جیهانییش ناسراو بوو، لە ماوەی پێنج ساڵدا كە سەرۆكی ئەم زانكۆیە بوو، توانی زانكۆكە بخاتە سەر پێ و پێشی بخات، ئەو توانی دڵسۆزانە و نیشتمانپەروەرانە خزمەتی زانكۆكە بكات، بۆیە من دكتۆر شێرزاد نەجاڕ هاوشانی دكتۆر عەبدولجەبار عەبدوڵا دادەنێم، هەردووكیان وەك بواری هەستكردن بە بەرپرسیارێتیی نیشتمانی و كەسایەتیی دیموكراسی بوون، باوەڕیان بە خۆشەویستیی نیشتمان و زانست هەبوو، جێی ڕێز و پێزانینی قوتابییەكانی خۆیان بوون.

لە ماوەی تەمەنیدا، دكتۆر شێرزاد نەجاڕ خاوەنی نووسینی زۆر بووە، كۆتا نووسینیشی بریتی بوو لە كتێبێك بە ناوی (چۆن سیاسییانە بیر بكەینەوە) كە نزیكەی (600) لاپەڕەیە و لە چاپكراوەكانی دەزگای ڕۆشنبیریی گوڵان بوو، ئەم كتێبە دەنگۆیەكی باشی هەبوو، هەروەها سوودبەخش بوو بۆ داڕێژەرانی بڕیاری سیاسی و ڕۆشنبیران و ئەكادیمیستەكان. ئەو نامە و تێزانەی ماستەر و دكتۆرا كە بەڕێز دكتۆر شێرزاد نەجاڕ سەرپەرشتی كردن، هەموویان لە بواری دەستووری و سیستمە سیاسییەكان و زانستە سیاسییەكان و پەیوەندییە نێودەوڵەتییەكان بوون، شوێن پەنجەی ئەو نامە و تێزانە و قوتابییانە گرنگە، ئێستا بەشێكی زۆریان لە داڕێژەرانی بڕیاری سیاسین لە ئاستی هەرێمی كوردستان و عێراق و تەنانەت پەیوەندیی نێودەوڵەتیشیان هەیە.

وڵاتە عەرەبییەكان و بەشێك لە وڵاتانی جیهان حیسابێكی تایبەتی بۆ دكتۆر شێرزاد نەجاڕ دەكەن، ئەو پەیوەندییانەی هەیەتی گەواهیدەری ئەم ڕاستییەن. ئەوەی شایانی باسە و نابێ لە بیری بكەین، ئەوەیە كە بە دڵنیاییەوە دەڵێم دكتۆر شێرزاد نەجاڕ مرۆڤێكی پڕ بەها، واتا بەهای خۆشەویستیی نیشتمان و كوردستان و شارەكەی (هەولێر) بەتایبەتییە، هەروەها وەفاو دڵسۆزیی بۆ هەڤاڵ و برادەرەكانی، كە زۆر مرۆڤانە بیردەكاتەوە، پەیوەندییەكی پتەوی هەیە لەگەڵ ڕۆشنبیرانی وڵاتەكەی و شارەكەی، دووپاتیشی دەكەمەوە كە ئەو وەفایەی هەیەتی بۆ شارەكەی خۆی لەوەدا بەرجەستەیە كە لە ساڵانی سەختدا لە ئەوروپاوە گەڕایەوە بۆ شارەكەی و شان بەشانی هاوڕێكانی لە زانكۆ خزمەتێكی زۆری زانكۆیان كرد، ئەگەر دكتۆر شێرزاد نەجاڕ نەبوایە خوێندنی باڵا لە كوردستان بەرەو ئاستێكی دیكە دەچوو، بەڵام بە هەوڵ و ماندووبوونی ئەو، زانكۆ و خوێندنی باڵا هاتەوە سەر ڕێچكەی خۆی، بۆیە ئەو پێشكەوتنەی لەم بوارەدا هاتەدی، بە هەوڵ و كۆششی پڕۆفیسۆر دكتۆر شێرزاد نەجاڕ بووە.

دكتۆ شێرزاد نەجاڕ هاوڕێیەكی دڵسۆزی ڕاگەیاندنی بەرپرسە، ماوەی (30) ساڵە لەگەڵ گۆڤاری (گوڵان)ی خۆشەویست لە نووسینەكانی بەردەوامە، نووسینەكانیشی لەسەر ئاستێكی ئەكادیمیی بەرزن، حیسابێكی تایبەتییان بۆ دەكرێت، جگە لەمە لە میدیا عەرەبییەكانیشدا پەیوەندی و نووسینی هەیە، هەروەها ڕۆڵی سیاسیی دكتۆر شێرزاد نەجاڕ لە خزمەتكردنی وڵاتەكەی لە شیكردنەوەكانی و پەنا بردن بۆ بەها پیرۆزەكانی نیشتمانی و دیموكراسی و نەتەوەیی ڕوون و بەرچاوە.

لە كۆتاییدا دەڵێم ئەم هەنگاوە، هەنگاوێكی بەرز و پیرۆزە، كە پەنا بردرا بۆ ئەوەی پڕۆفیسۆر دكتۆر شێرزاد نەجاڕ وەك سومبلی دەستپاكی هەڵبژێردرێت، شانبەشانی بەڕێزانی دیكە، كە ئەوانیش ڕۆڵیان دیار و بەرچاوە، هەر یەكە لە بواری پسپۆری و كارەكەی خۆیدا، لە خزمەتكردنی ڕێڕەوی دەستپاكی و ڕووبەڕووبوونەوەی گەندەڵیدا، هیوای سەركەوتن و تەمەن درێژیی بۆ دەخوازم.