سەرۆکی حکوومەتی هەرێمی کوردستان، لە پەیوەندییەکی تەلەفۆنیدا، پیرۆزبایی لە سەرۆک وەزیرانی نوێی فیدراڵ کرد
مەسرور بارزانی سەرۆکی حکوومەتی هەرێمی کوردستان، لە پەیوەندییەکی تەلەفۆنیدا، پیرۆزبایی لە محەمەد شیاع سوودانی سەرۆک وەزیرانی نوێی فیدراڵ کرد بەبۆنەی متمانەپێدانی لە لایەن پەرلەمانی عێراقەوە.
سەرۆکی حکوومەت، هیوای سەرکەوتنی بۆ سەرۆک وەزیرانی نوێی فیدراڵ خواست لە ئەرکی تازەیدا. لەمبارەیەوە، سەرۆکی حکوومەت لە تویتێکدا ڕای گەیاند: "ئەمشەو بە تەلەفۆن لەگەڵ سەرۆک وەزیران محەمەد شیاع سوودانی قسەم کرد و دڵنیام کردەوە کە پشتیوانیی دەکەم لە پێناو دەستپێکێکی نوێ لە پەیوەندییەکانی نێوان هەولێر و بەغدا، کە ببێتە هۆی پەرەپێدانی هەماهەنگی و گفتوگۆ لە بری ململانێ و ڕووبەڕووبوونەوە، وڵات پێویستی بەم جۆرە هاوبەشیەیە."
