دوێنێ یەکشەممە هەزاران کەس لە پاریسی پایتەختی فەرەنسا خۆپیشاندانیان ئەنجامدا بۆ ناڕەزایەتی دەربڕین بەرامبەر بە گرانی نرخەکان و "بێهەڵوێستی حکومەت لەبارەی گۆڕانی کەشوهەوا".

پۆلیس ژمارەی خۆپیشاندەرەکانی بە 30 هەزاركەس داناوە، بەڵام ڕێکخەران ئەم ژمارەیە بە 140 هەزار کەس مەزەندە دەکەن.

ئەم ڕێپێوانە لەسەر بانگهێشتی "هاوپەیمانی نوێی ژینگەناسی و کۆمەڵایەتی گەل" بەڕێوەچوو کە لە گرووپە چەپەکان پێکهاتووە.

یەکێتیە بازرگانییە گرنگەکانی فەرەنسا داوای بەشداریکردنیان لەم ڕێپێوانەدا نەکردووە بۆ پاراستنی سەربەخۆیی خۆیان.

بەشداربووانی خۆپیشاندانەكە داوای زیادكردنی مووچە و جێگیر هێشتنەوەی نرخەكان و كەمكردنەوەی تەمەنی خانەنشینی و گرنگیدان بە پرسە ژینگەییەكانیان كرد.

لە هەندێک شوێنی شارەکە خۆپیشاندەران توندوتیژیان ئەنجامدا و هێرشیان کردە سەر هەندێک شوێن، لەنێویاندا بانکەکان، پۆلیس بۆ بڵاوەپێکردنی خەڵک لە هەندێک شوێن سپرای بیبەری بەکارهێناوە.

هەڵاوسان و بەرزبوونەوەی نرخەکان لە فەرەنسا شەپۆلێکی ناڕەزایی لێکەوتەوە.

 

 

 

گوڵان: سەردار خەلیل