بەرگری شارستانی نیجەر ڕایگەیاند: بەهۆی بارینی بەخوڕ و لافاو لەم وڵاتەدا 200 کەس گیانیان لەدەستداوە و چارەکێک ملیۆن کەسیش زیانیان بەرکەوتووە.

بەرگریی شارستانی نیجەر زیانەكانی ئەم لافاوانەی بە یەكێك لە زۆرترین زیانەكانی تۆمار كردووە: لافاوەكانی وەرزی بارانبارین بووەتە هۆی كوژرانی 200 كەس و زیاتر لە 264 هەزار كەسیش زیانیان بەركەوتووە و زیاتر لە 30 هەزار خانووش وێران بووە، هەروەها لافاوەکە زیانی بە قوتابخانەکان گەیاندووە و زیانی بە ناوەندە پزیشکییەکان و کۆگاکانی دانەوێڵە گەیاندووە.

ئەو ناوچانەی کە زۆرترین زیانیان بەرکەوتووە بریتین لە مورادی و زاندەر لە ناوەند، دۆسۆ لە باشووری ڕۆژئاوا و تاوە لە ڕۆژئاوای ئەم وڵاتە.

وەرزی بارانبارین لە ناوچەكانی ناوەڕاستی نیجەر ، بەزۆری لە مانگی حوزەیرانەوە تا ئەیلول دەخایەنێت و زۆربەی کات زیانی گیانی لێکەوتووەتەوە.

لە ساڵی ٢٠٢١دا ٧٠ کەس بەهۆی ئەو لافاوانەوە گیانیان لەدەستداوە  و ٢٠٠ هەزار کەسی دیکەش زیانیان بەرکەوتووە. هەروەها ژمارەی کوژراوانی ئەم لافاوانە لە ساڵی ٢٠٢٠دا ٧٣ کەس بووە.

 

 

 

گوڵان: سەردار خەلیل