سەرۆکی میسر چاویکەوت بە ئەمیری قەتەر کە شەوی ڕابردوو گەیشتە قاهیرە.

تەلەڤزیۆنی میسر بڵاویکردەوە، كە سەرۆکی ئەو وڵاتە عەبدولفەتاح ئەلسیسی و ئەمیری قەتەری شێخ تەمیم بن حەمەد ئەلثانی لە کۆشکی « ئیتحادیە »ی قاهیرە کۆبوونەوە و گفتوگۆیان کرد.

بەو پێیە هەردوولا بیروڕایان ئاڵوگۆڕکرد لەسەر پەیوەندییە دووقۆڵییەکان لەبوارە گرنگەکانی بەرژەوەندیی هاوبەش، هەروەها ئەلسیسی و ئەلثانی گفتوگۆیان لەبارەی کێشەی هەرێمی و جیهانییەکان کرد.

ئەمیری قەتەر شەوی ڕابردوو دوای گەیشتنی بە فڕۆكەخانەی نێودەوڵەتی قاهیرە، لە لایەن ئەلسیسی پێشوازی لێکرا.

گرژی و ئاڵۆزییەکانی نێوان قەتەر و میسر دوای لوتکەی « ئەلعەلا » لە سعودیە لە کانونی دووەمی 2021 دا ئاسانتر بوو و لە ماوەی چەند مانگی ڕابردوودا، كۆبوونەوەكانی فەرمی لە نێوان وەزیرانی هەردوو وڵاتدا ئەنجام دراوە.

دەوترێت كەلە 5ی حوزەیرانی 2017دا « سعودیە و میسر و بەحرەین و ئیمارات » هەموو پەیوەندییە دیپلۆماسییەکانیان لەگەڵ قەتەردا بە كۆتا هێنا  و سزای ئابووریان لە دژی ئەو وڵاتەدا سەپاند.  

 

 

 

گوڵان: سەردار خەلیل