وەزارەتی خوێندنی باڵای عیراق لێدانی پێكوتەی كۆڕۆنا دەكاتە مەرجی دەوامكردن
وەزارەتی خوێندنی باڵای عێراق بڕیاریداوە، وەرگرتنی ڤاکسینی دژە کۆرۆنا بکاتە مەرج بۆ دەوامکردن لە زانکۆ و پەیمانگا حکوومی و ناحکومییەکان.
وەزارەتی خوێندنی باڵای عێراق لە نووسراوێکدا کە رۆژی دووشەممە 23/8/2021 بڵاوکراوەتەوە و تێیدا هاتووە کە وەرگرتنی ڤاکسین بکرێتە مەرجی دەوامکردنی قوتابیان و مامۆستایان و فەرمانبەرانی زانکۆ و پەیمانگا حکوومی و ناحکوومییەکان و بە پێچەوانەوە بە ئامادەنەبوو دادەنرێن.
لە نووسراوەكەدا ئەوەشی تێدا هەیە كە ئەوانەی وەرگرتنی ڤاکسین نایانگرێتەوە پێویستە هەفتانە پشکنین(P C R) ئەنجام بدەن و پێشكەشی فەرمانگەكانیان بكەن بۆ ئەوەی بسەلمێنێت هەڵگری ڤایرۆسی كۆڕۆنا نین. ئەو بڕیارو هەنگاوەی وەزارەتی خوێندنی باڵای عیراق لەو كاَتەدایە كە ژمارەی تووشبووانی كۆڕۆنا لە عێراق لە زیاد بوونە و وەرگرتنی ڤاكسنیش لە ئاستێكی نزمدایە. هەروەها وەزارەتی خوێندنی باڵا ئاماژەی بەوەداوە كە ئەو بڕیارانە لەسەر داوای ئەمینداریەتی گشتی ئەنجوومەنی وەزیرانی عێراقەوەیە.
ئامادەكردنی:گوڵان/ساڵح عومەر