لینین پێی وابوو باڵادەستیی مۆنۆپۆڵی، سیما و تایبەتمەندییەكی ئیمپریالیزمە، ئەمەی دواییش لە ڕێگەی چەپكێك مۆنۆپۆلیستەوە ئیستغلالكردن و چەوساندنەوەی چینی كرێكار و زەحمەتكێشەكان خەستتر دەكاتەوە. لەم ساڵانەی دواییدا چەند هەوڵێك دراوە بۆ شیكارییكردنی پاڵنەرەكانی جەنگی ئیمپریالیستی، ئایدیاكانی لینین لەمەڕ پرسی ئیمپریالیزم وەك دوایین قۆناغی سەرمایەداری هەنوكەییبوونی خۆی دەسەلمێنێت، هەروەها هانمان دەدات جارێكی دیكە شیكاری بۆ ڕیشە ئابوورییەكانی ئەم سیستەمە بكەین. پێشتر لینین گوتی ئیمپریالیزم بەردەوام لەپێناو دابەشكردن و دووبارە دابەشكردنەوەی موستەعمیرە و ناوچە ژێردەستەكانی سەرمایەداریدا جەنگ بەرپا دەكات، لەگەڵ جەنگی هەمیشەیی ئیمپریالیزم، سەرمایەداری شكڵێكی نوێی وەرگرتووە، كە بریتییە لە پڕۆژەی ئابووریی نیولیبراڵیزم، ئەوەش لەڕێگەی قەرزەكانی بانكی جیهانییەوە، بەپێی ڕاسپاردەكانی ئەم دامەزراوە ئایدۆلۆژییە دەبێت و، ڵاتانی قەرزوەرگر و پاشكۆ سەرجەم كەرتە گشتی و خزمەتگوزارییە بنەڕەتییەكانی ژیان (تەندروستی، پەروەردە و.. هتد) بكەن بە پارە و چیتر خزمەتگوزاریی گشتی و خۆڕایی نامێنێت، بەرژەوەندیی ئۆلیگاریشیی حوكمڕانیش لە وڵاتانی جیهانی سێهەمدا (گۆڕەپانی جەنگ‌)، لەوەدایە دەرامەت و سامان بەشێوەیەكی نایەكسان لە بەرژەوەندیی خۆیان دابەش بكەن.