دوای ئەوەی بەسەركەوتوویی تێستی ئیشپێكردن و بەستنەوەی وێستگەی بەرهەمهێنانی 165 مێگاواتی گەرمیان بەوێستگەكانی كەلار و كفری و غازی سلێمانی ئەنجام درا ، بڕیارە لەكۆتایی ئەم مانگەدا 100 مێگاواتی كارەبای لێ بەرهەم بێت و لەمانگی حوزەیرانیشدا بەفەرمی وێستگەكە لەمەراسیمێكدا ئیشیپێ بكرێت و 165 مێگاوات كارەبا بخرێتە ناو تۆڕی كارەبای نیشتمانی كوردستانەوە . وێستگەی 165 مێگاواتی لەگەرمیان بەچەند قۆناغێك جێبەجێ دەكرێت و لەڕێگەی سوودوەرگرتن لەو بڕە غازەی كە لە كێڵگەكانی نەوتی حەسیرە لە ئێستادا بەفیڕۆ دەڕوات ئەو وێستگەیە بەگەڕ بخرێت . ئەمەش بۆ یەكەمین جارە لەعێراق بەگشتی لەرێگەی سوود وەرگرتن لەغازی بەفیڕۆچووی كێڵگە نەوتەكان كارەبا بەرهەم بهێنرێت كە جگە لەكەمی تێچوونی بەرهەمهێنانەكەی سوودێكی رادەبەدەری بۆ ژینگەش هەیە.