باڵەفڕەكانى توركیا گوندەكانى بنارى قەندیل بۆردمان دەكەن
كوێستان ئەحمەد بە ئاژانسى كوردستان بۆ دەنگوباس (ئاكانیوز)ى راگەیاند \"شەوى رابردوو سەعات 23:30 باڵەفڕە شەڕوانییەكانى توركیا گوندەكانى لێوژىَ، ئێنزىَ و گەلى تەورێیان لە سنوورى شارەدێى سەنگەسەر/11 كم رۆئاواى قەڵادزێ/ بۆردمان كرد و بەهۆى ئەو بۆردمانەوە ئاگر لەو شوێنانە كەوتووەتەوە و ئەو باڵەفڕانە بۆ چەندان جاریش بەسەر گوندەكانى پردەشاڵ، بۆكریسكان و زارگەڵى لە سنوورى شارەدێى وەرتێ/60 كم باكورى رۆهەڵاتى رواندز/ سوڕاونەتەوە\"".
زیاتر گوتى\"" ئەو ناوچانەى بۆردمان كراون، زۆر نێزیكن لە سنوورى وەرتىَ و بە قسەى خەڵكى ناوچەكە زیاتر لە 10 باڵەفڕى شەڕوانى بوونە كە ئەو شوێنانەیان بۆردمان كردووە، ئەوەش بووەتە هۆى دروستبوونى ترس و دڵەڕاوكێ لاى خەڵكى ئەو گوندانە، بەڵام زیانی گیانى لێ نەكەوتووەتەوە\"".
زۆرجار ناوچە سنوورییەكانى هەرێمى كوردستان و بە تایبەت بنارى چیاى قەندیل رووبەڕووى تۆپبارانى سوپاى ئێران و توركیا دەبنەوە، ئەویش بەبیانووى بوونى شەڕوانانى پارتى ژیانى ئازادی كوردستان (پژاك) و پارتى كرێكارانى كوردستان (پەكەكە) و تا ئێستە بەو هۆیەوە زیانێكی بەرچاو بەدانیشتووان و ژینگەى دەڤەرەكە گەیشتووە و لە ساڵانى رابردووش زیانى گیانیشى لێ كەوتووەتەوە.
"