بەڕێز (نێچیرڤان بارزانی) لەپەیامێكدا كە لەلاپەڕەی خۆی لە فەیسبووك بڵاوی كردۆتەوە دووای سەری رێز و نەوازش بۆ شەهیدانی كارەساتی كیمیابارانی هەڵەبجە، خوازیارە ئەو كارەساتەببێت بە هاندەرێك بۆ ئاوەدانكردنەوەی كوردستان.. ئەمەی خوارەوە دەقی پەیامەكەی بەڕێزیانە:


هاوڕێیانى ئازیز، ئەمڕۆ 16ى ئادار یادى کارەساتى کیمیابارانى هەڵەبجەى شەهید دەکەینەوە. لەو رۆژەى ساڵى 1988 شارى هەڵەبجە کەوتە بەر پەلامارى دڕندانەى رژێمى بەعسى گۆڕبەگۆڕ و لەئاکامدا زیاتر لە پێنج هەزار هاوڵاتى ئەو شارە گیانیان لەدەستدا و هەزارانى تریش برینداربوون. ئەمڕۆ دەبێ ئەم بۆنەیە بکەین بە هاندەرێک بۆ زیاتر ئاوەدانکردنەوە و پەرەپێدان و پێشخستنى هەرێمى کوردستان. لە هەمان کاتیشدا سەرى رێز و نەوازش لەبەردەم خانەوادەى خۆڕاگرى شەهیدانى هەڵەبجە و ئەنفالەکان دادەنوێنین و پەیمانیان بۆ دووپات دەکەینەوە کە بەردەوام بین لە خەباتکردن لە پێناو مافەکانیان و ئایندەیەکى گەش بۆ هاوڵاتیانى هەرێمى کوردستان.