ئەمرۆ چوارشەممە 1/6/2011 بەرێز مسعود بارزانی سەرۆكی هەرێمی كوردستان لە پەیوەندییەكی تەلەفۆنیدا لەگەڵ سەرۆك مام جەلال سكرتێری گشتی یەكێتی نیشتمانیی كوردستان ساڵیادی دامەزراندنی یەكێتی لە بەرێزیان پیرۆزكرد و هیوای لەش ساغی و سەركەوتنی بۆ خواست.

هەر لەو پەیوەندییەدا ، سەرۆك بارزانی دووپاتی لە بەهێزكردنی پەیوەندی دوو قۆڵی و هاوپەیمانێتی و برایەتی نێوان پارتی و یەكێتی كردەوە كە زامنێكی پتەوە بۆ پاراستن و گەشەپێكردنی دەستكەوتەكان و هێنانەدی سەركەوتن و دەستكەوتی گەورەتر بۆ گەلی كوردستان.

سەرۆك مام جەلال زۆر سوپاسگوزاری سەرۆك بارزانی بوو بۆ ئەو پەیوەندیی و پیرۆزباییە و هیوای خواست كە ئەو یەك هەڵوێستی و هەماهەنگییەی كە لە نێوان هەر دوولا هەیە لە خزمەتی بەرژەوەندی باڵای گەلی كوردستان و مەسەلە چارەنووسسازەكاندا بێت.