به‌بۆنه‌ی رِۆژی جیهانی ژنان نووسینگه‌ى نوێنه‌رایه‌تی حكومه‌تی هه‌رێمی كوردستان له‌ رِۆما له‌ وڵاتی ئیتاڵیا به‌ ئاماده‌بوونى خاتوو رِێزان ساڵح قادر ئاغا نوێنه‌رى حكومه‌تى هه‌رێم له‌ ئیتاڵیا و به‌ به‌شداری ژماره‌یه‌ك له‌ ئافره‌تانى كورد و عه‌ره‌ب و ئیتاڵی و به‌رپرسی كۆمیته‌ی ناوه‌ندی یه‌كێتی نیشتمانی كوردستان و به‌رپرسی رِه‌وه‌ندی كوردی ئاهه‌نگێكى پێشوازى و ئێواره‌ خوانێكى رێكخست.

له‌ رێوره‌سمه‌كه‌دا به‌رپرسی نوێنه‌رایه‌تی حكومه‌تی هه‌رێم به‌خێرهاتنی میوانانى كردوو تیشكی خسته‌ سه‌ر هه‌ڵومه‌رجی ژنان له‌قۆناغه‌ جیاجیاكاندا ورۆڵى ئافره‌تانی ئاشتی و ئازادی خوازی كوردى به‌رز نرخاند كه‌ به‌درێژایی مێژوو شان به‌شانی پیاوان له‌سه‌نگه‌ر و مه‌یدانی چالاكی و فیداكاریدا خه‌باتیان كردووه‌و بوونى خۆیان سه‌لماندووه‌و شوێن په‌نجه‌یان زۆر به‌ زه‌قی به‌ به‌رچاوده‌كه‌وێت.
به‌شێكی تری باسه‌كه‌ بریتی بوو له‌ كارو تێكۆشانی توێژی ئافره‌تان له‌ بواری مه‌ده‌نی و جه‌ماوه‌ریدا، كه‌ له‌ راستیدا توانیویانه‌ هه‌ندێك له‌مه‌به‌ست و ئامانجه‌كانیان ده‌سته‌به‌ر بكه‌ن كه‌جێگای شانازیوو به‌خته‌وه‌ریه‌ به‌م مانایه‌ بوونی رِێژه‌یه‌كی به‌رچاو له‌ژنانی پێگه‌یشتوو و لێهاتوو له‌ناو په‌رله‌مانی كوردستاندا و له‌به‌شه‌كانی دیكه‌ی بواری كۆمه‌ڵایه‌تی و كه‌لتوری و هونه‌ریی و زانستی سه‌لمێنه‌ری ئه‌م رِاستیه‌یه‌ كه‌مێژوویه‌كی پرِله‌سه‌رفرازیوو سه‌ربه‌رزی بۆخۆیان و نه‌ته‌وه‌كه‌یان تۆماركردوه‌ .

له‌كۆتایدا نوێنه‌ری حكومه‌تی هه‌رێمی كوردستان پیرۆزبایی خۆی ئاراسته‌ی سه‌رجه‌م ئافره‌تانى جیهان و به‌تایبه‌ت ئافره‌تانى كوردستان كرد.