له كۆشكی ئێلیزێ، سه‌رۆكی فه‌ره‌نسا پێشوازیی له سه‌رۆكی هه‌رێمی كوردستان كرد
سه‌رۆكی فه‌ره‌نسا به گرینگیه‌وه له بنیادنانی په‌یوه‌ندیه‌كی توندی سیاسی و ئابووری له نێوان هه‌رێم و فه‌ره‌نسا دواو ، سه‌رۆكی كوردستانیش واڵایی تێكڕایی ده‌رگاكانی هه‌رێمی بۆ دۆستایه‌تی له‌گه‌ڵ فه‌ره‌نسا دووپات كرده‌وه .
ساركۆزی ڕاشكاوانه رایگه‌یاند: فه‌ره‌نسا به هاوپه‌یمانیه‌تی له‌گه‌ڵ كوردستان خۆشحاڵه و به بایه‌خه‌وه ئه‌و هاوپه‌یمانیه‌تیه له‌گه‌ڵ هه‌رێم دووپات ده‌كاته‌وه .
سه‌باره‌ت به دۆسیه‌ی عێراقیش سه‌رۆك بارزانی په‌ره‌سه‌ندنه‌كانی دوای هه‌ڵبژاردن و پێكهێنانی حكومه‌تی تازه‌ی فیدراڵی و هه‌نگاوه‌كانی شیكرده‌وه، سه‌رۆك ساركۆزیش ڕۆڵی كوردستان و سه‌رۆك بارزانی له پرۆسه‌ی سیاسی عێراق و سه‌رخستنی قۆناغه‌كانیدا به كاریگه‌ر لێكدایه‌وه.
سه‌رۆكی فه‌ره‌نسا زه‌روره‌تی عێراقێكی دیموكراتی و فره‌یی كه تیایدا خه‌ڵكی كوردستان ئازادو ئاسووده‌بن وه‌ك هه‌ڵوێستی ڕه‌سمی وڵاته‌كه‌ی دووپات كرده‌وه .
سه‌رۆكی هەرێمی كوردستانیش مانه‌وه‌ی عێراقێكی یه‌كگرتووی سه‌قامگیری به دیموكراتیه‌ت و فره‌یی و فیدراڵی وڵاته‌كه‌وه گرێدا .
به لای ساركۆزیه‌وه ڕۆڵی هه‌رێمی كوردستان له بنیادنانی عێراقێكی دیموكراتی فره‌یی ڕۆڵێكی كاریگه‌ر بوو .
سه‌رۆك بارزانیش ئاماده‌یی خۆی و هه‌رێمی كوردستانی بۆ عێراقێك كه له دیكتاتۆر خاڵی بێت نیشاندا .
له كۆتاییشدا نیكۆڵا ساركۆزی سه‌رۆكی فه‌ره‌نسا ئاره‌زووی خۆی بۆ سه‌ردانی هه‌رێمی كوردستان ده‌ربڕی و ، سه‌رۆك بارزانیش خۆشحاڵی خۆی و گه‌لی كوردستانی بۆ ئه‌و سه‌ردانه نیشانداو بانگهێشتی ڕه‌سمی سه‌رۆكی فه‌ره‌نسای بۆ سه‌ردانی هه‌رێمی كوردستان كرد.
