ئه‌مرِۆ به‌رِێز دكتۆر به‌رهه‌م ئه‌حمه‌د ساڵح سه‌رۆكى حكومه‌تى هه‌رێمى كوردستان به‌ یاوه‌رى به‌رِێزان كه‌ریم سنجارى وه‌زیرى ناوخۆو سینان چه‌له‌بى وه‌زیرى پیشه‌سازى و بازرگانى و جه‌میل سلێمان وه‌زیرى كشتوكاڵ و فه‌لاح مسته‌فا به‌رپرسى په‌یوه‌ندیه‌كانى ده‌ره‌وه‌ى حكومه‌ت ژماره‌یه‌ك له‌ به‌رپرسانى حكومه‌تى هه‌رێم گه‌یشته‌ له‌نده‌نى پایته‌ختى به‌ریتانیاو له‌لایه‌ن به‌رِێزان به‌یان سامى عه‌بدولرِه‌حمان نوێنه‌رى حكومه‌تى هه‌رێم له‌ به‌ریتانیاو هه‌ڵسورِێنه‌رى كاروبارى باڵیۆزخانه‌ى عیراق له‌ به‌ریتانیا پێشوازیان لێكرا.

بڕیاره‌ كۆنفرانسی گه‌شه‌پێدانی ئابووری هه‌رێمی كوردستان له‌رۆژانی 15-16 ی ئه‌م مانگه‌، به‌ئاماده‌بوونی نوێنه‌رانی بازرگانی وڵاتانی جیهان و به‌شداریی وه‌فدێكی باڵای حكومه‌تی هه‌رێمی كوردستان له‌شاری له‌نده‌ن ساز بكرێت.

ئامانج له‌كۆنفرانسه‌كه‌ به‌ره‌وپێش بردنی زیاتری ره‌وشی وه‌به‌رهێنانه‌ له‌هه‌رێمی كوردستان و هاندانی كۆمپانیاكانی جیهانه بۆ سه‌رمایه‌گوزاریی كردن تيايدا، هه‌روه‌ها بۆ ناساندنی ژووره‌ بازرگانی و پیشه‌سازییه‌كانی هه‌رێمی كوردستانه به‌ ژووره‌ بازرگانییه‌كانی وڵاتان.

سایتی كۆنفرانسى كوردستان له‌زاری د. به‌رهه‌م ساڵح بڵاویكرده‌وه‌، "حكومه‌تی هه‌رێم پێشوزایی له‌و كۆمپانیا بیانییانه‌ ده‌كات كه‌دێنه‌ هه‌رێمی كوردستان و سه‌رمایه‌كانیان به‌گه‌ڕده‌خه‌ن له‌پێناو به‌ره‌وپێش بردنی كه‌رتی تایبه‌ت و به‌ره‌وپێش بردنی بواری ئابوری هه‌رێمی كوردستان، ئه‌مه‌ش واده‌كات ناوچه‌كه‌ ببێته‌ مه‌ڵبه‌ندی ئاڵوگۆڕی بازرگانی و بنیاتنان و ده‌روازه‌یه‌كیش بێت بۆ هه‌موو ناوچه‌كانی دیكه‌ی عیراق".