ئه‌مڕۆ له‌ جێگای مانه‌وه‌ی له‌ ئه‌سته‌مبۆل به‌رێز مه‌سعود بارزانی سه‌رۆكی هه‌رێمی كوردستان له‌گه‌ڵ سه‌رنووسه‌ر و به‌ڕێوه‌به‌ری نووسینی ژماره‌یه‌ك له‌ گۆڤار و رۆژنامه‌و بڵاوكراوه‌ سیاسیه‌ به‌ ناوبانگه‌كانی توركیادا كۆبووه‌وه‌و له‌ دیاڵۆگێكی كراوه‌دا سه‌رۆك بارزانی ره‌وشی سیاسی و ئیداری و ئابووری هه‌رێمی كوردستان و ئاینده‌ی هه‌رێمه‌كه‌ و عێراق و ناوچه‌كه‌ی بۆ سه‌رنووسه‌ر و به‌رێوه‌به‌رانی نووسینی گۆڤار و رۆژنامه‌كان روونكرده‌وه‌ سه‌باره‌ت به‌ سه‌ردانه‌كه‌ی بۆ توركیا و ئاراسته‌ی وتووێژو راگۆڕینه‌وه‌كانی له‌گه‌ڵ سه‌رۆك وه‌زیران و به‌رپرسانی دیكه‌ی حكومه‌تی توركیا.

سه‌رۆك بارزانی سه‌ردانه‌كه‌ی به‌ سه‌ردانێكی گرنگ داناو پته‌وكردنی په‌یوه‌ندییه‌ سیاسیه‌ و ئابوورییه‌كانی نێوان هه‌رێم و توركیاشی وه‌ك ئاراسته‌یه‌ك كه‌ هه‌ردوولا له‌سه‌ری یه‌كده‌نگن شیكرده‌وه‌.

بۆ چاره‌سه‌ركردنی كێشه‌ سیاسیه‌كانی ناوچه‌كه‌ش سه‌رۆك بارزانی ته‌ئكیدی له‌ به‌كارهێنانی كه‌ناڵی دیاڵۆگ و لێكتێگه‌یشتن كرده‌وه‌ و پاڵپشتی خۆی و هه‌رێمی كوردستانیشی بۆ سیاسه‌تی كرانه‌وه‌ی دیموكراتی له‌ توركیا و هه‌ر پرۆسه‌یه‌كی دیكه‌ كه‌ كێشه‌كان به‌ ئاشتی چاره‌سه‌ر بكات، دووپاتكرده‌وه‌