له‌سه‌ر داوای سه‌رۆكی هه‌رێم، سه‌رۆكى په‌رله‌مان سه‌رپه‌رشتى كۆبونه‌وه‌ى ئیئتیلافى فراكسیۆنه كوردستانیه‌كان ده‌كات
له‌م كۆبونه‌وه‌یه كه دكتۆر محموود عوسمان و لایه‌نه سیاسیه‌كانى نێو ئیئتیلافى فراكسیۆنه كوردستانیه‌كان ئاماده‌بوون، پرسیی دوا پێشهاته سیاسیه‌كانى عیراق و هه‌وڵه‌كان بۆ نزیككردنه‌وه‌ى لایه‌نه سیاسیه براوه‌كانى ئه‌نجومه‌نى نوێنه‌رانى عیراق گفتوگۆگۆیان له‌سه‌ر كرا، تاوه‌كو لایه‌نه‌كانى نێو ئیئتیلافى فراكسیۆنى كوردستانى به یه‌ك ده‌نگ و یه‌ك هه‌ڵوێست، به‌پێى ئه‌و به‌رنامه‌یه‌ى كه ئاماده‌یان كردووه روو له‌به‌غدا بكه‌ن بۆ گفتوگۆو دانوستان له‌گه‌ڵ كوتله و لایه‌نه سیاسیه براوه‌كانى ئه‌نجومه‌نى نوێنه‌رانى عیراقى.
هه‌ر له‌م كۆبونه‌وه‌یه لایه‌نه‌كان به هه‌مان گوڕ و تین، یه‌ك هه‌ڵوێستى خۆیان نیشان دا و ئاماده‌ییان ده‌ربڕى بۆ ئه‌وه‌ى وه‌ك یه‌ك تیم روو له‌به‌غدا بكه‌ن و گفتوگۆكان ده‌ست پێ بكه‌ن، هاوكات له‌باره‌ى پرسه چاره‌نووسسازه‌كانى گه‌لى كوردستان و داخوازیه ره‌واكانى یه‌ك هه‌ڵوێست بوون وه‌ك چۆن له‌كارنامه‌ى ئیئتلافى فراكسیۆنه كوردستانیه‌كانیشدا هاتوه‌و به‌كۆى ده‌نگ جه‌ختیان له‌سه‌ر چاره‌سه‌ركردنى كێشه هه‌ڵپه‌سێرراوه‌كان و له‌پێش هه‌مووشیان كێشه‌ى كه‌ركوك و ناوچه كێشه له‌سه‌ره‌كان كرده‌وه،بۆ چاكردنه‌وه‌ى بارى دیموگرافى ئه‌و شارانه‌ى له‌سه‌رده‌مى رژێمى دیكتاتۆرى له‌رووى دیمۆگرافیه‌وه شێوێنراون، له‌وانه‌ش گه‌ڕانه‌وه‌ى چه‌مچه‌ماڵ و كفرى و دوز و كه‌لار بۆ سه‌ر كه‌ركوك و جێبه‌جێ كردنى ماده‌ى 140 به‌پێى ده‌ستورى عیراق و یاساى نه‌وت و غاز و پرسیی پێشمه‌رگه و بودجه و ئه‌نجام دانى سه‌ر ژمێرى و پابه‌ندبوونى ته‌واو به ده‌ستورى عیراقى فیدراڵ و هاوبه‌شیى راسته‌قینه.
