ئاهه‌نگی نوێنه‌رایه‌تی حکومه‌تی هه‌رێمی کوردستان و ڕه‌وه‌ندی کوردی له‌ به‌ریتانیا بۆ یه‌که‌مین ئه‌ندامی کورد ‏له‌ په‌رله‌مانی به‌ریتانیا

ئاهه‌نگی نوێنه‌رایه‌تی حکومه‌تی هه‌رێمی کوردستان و ڕه‌وه‌ندی کوردی له‌ به‌ریتانیا بۆ یه‌که‌مین ئه‌ندامی کورد ‏له‌ په‌رله‌مانی به‌ریتانیا
به‌ مه‌به‌ستی ڕێزلێنان و ئاهه‌نگ گێڕان بۆ ئه‌و سه‌رکه‌وتنه‌ مه‌زنه‌ی که‌ نازم زه‌هاوی که‌ هاووڵاتییه‌کی به‌ریتانی ‏به‌ڕه‌گه‌ز کوردی عیراقه‌ له‌ هه‌ڵبژاردنه‌کانی په‌رله‌مانی به‌ریتانیا به‌ده‌ستی هێنا و بوو به‌ ئه‌ندامی په‌رله‌مانی ئه‌و ‏ووڵاته‌ ، نوێنه‌رایه‌تی حکومه‌تی هه‌رێمی کوردستان ئێواره‌ خوانێکی به‌م بۆنه‌یه‌ سازکرد.‏

ئاماده‌بووانی ئه‌م ئێواره‌ خوانه‌ که‌ کۆمه‌ڵێک ئه‌ندام په‌رله‌مانی به‌ریتانیا و سیاسه‌توان و ئه‌کادیمی و نوێنه‌رانی ‏وه‌زاره‌تی ده‌ره‌وه‌ی به‌ریتانیا و باڵیۆزخانه‌ی عیراقی و دیپلۆتماتکارانی بیانی و چه‌ندین که‌سایه‌تی کوردی و ‏عیراقی بوون خۆشحاڵی خۆیان به‌و ڕووداوه‌ مێژووییه‌ ده‌ربڕی که‌ بۆ یه‌که‌مین جاره‌ له‌ مێژووی سیاسی ئه‌و ووڵاته‌ ‏بۆ کوردێک تۆمار بکرێت. هه‌روه‌ها هیوایان خواست که‌ له‌ کاره‌که‌یدا سه‌رکه‌وتوو بێت و خزمه‌ت به‌ پرس و ‏داخوازییه‌کانی ووڵاته‌که‌ی خۆی بکات.‏

خاتوو به‌یان سامی عبدالرحمان نوێنه‌ری حکومه‌تی هه‌رێمی کوردستان له‌ به‌ریتانیا له‌ ووته‌یه‌کی به‌خێرهێناندا ‏دڵخۆشی حکومه‌تی هه‌رێم و ڕه‌وه‌ندی کوردی له‌ به‌ریتانیا بۆ هه‌واڵی سه‌رکه‌وتنی نازم زه‌هاوی ده‌ربڕی و ‏سه‌رکه‌وتنی ناوبراوی به‌ دڵڕفێن ناوزه‌د کرد.‏

نوێنه‌ری حکومه‌تی هه‌رێمی کوردستان هه‌روه‌ها ووتی:" ئێمه‌ شانازی به‌و ده‌ستکه‌وته‌ مه‌زنه‌ی نازم زه‌هاوی ‏ده‌که‌ین که‌ به‌ڵگه‌یه‌ له‌سه‌ر توانای ئه‌و که‌سه‌ له‌ چۆنییه‌تی مامه‌ڵه‌کردن له‌گه‌ڵ نه‌ته‌وه‌ جیاجیاکان له‌ ئاستی جیاوازدا. ‏سه‌رکه‌وتنی ناوبراو نموونه‌یه‌که‌ له‌سه‌ر ئه‌و کاردانه‌وه‌یه‌ی که‌ ره‌وه‌ندی کورد ده‌توانن بیکه‌ن له‌ کۆمه‌ڵگا و ژیانی ‏سیاسی له‌ به‌ریتانیا. هیوادارین که‌ نازم زه‌هاوی به‌رده‌وام بێت له‌ سه‌رکه‌وتن." ‏

دواتر نازم زه‌هاوی ئه‌ندامی تازه‌ هه‌ڵبژێردراوی په‌رله‌مانی به‌ریتانیا له‌ پارتی پارێزگارانه‌وه‌ ووته‌یه‌کی پێشكه‌ش ‏کرد. ناوبراو سوپاسی نوێنه‌رایه‌تی حکومه‌تی هه‌رێمی کوردستان له‌ به‌ریتانیای کرد بۆ سازدانی ئه‌و ئێواره‌ خوانه و ‏خۆشحاڵی خۆی به‌ بینینی مێوانه‌کان ده‌ربڕی . زه‌هاوی زیاتر ووتی:" له‌ ساڵی 1978 باوکم عیراقی به‌جێهێشت له‌ ‏ترسی چه‌وساندنه‌وه‌ی ڕژێمی سه‌ددام ته‌نها له‌به‌ر ئه‌وه‌ی کورد بوو. ئێمه‌ به‌خته‌وه‌ر بووین که‌ توانیمان بیینه‌ ‏به‌ریتانیا و لێره‌ هه‌ست به‌ ئازادی و سه‌ربه‌ستی بکه‌ین. من داوا له‌ کورده‌کانی دانیشتووی به‌ریتانیا ده‌که‌م که‌ به‌ ‏جیددی بێنه‌ ناو ژیانی کۆمه‌ڵایه‌تی و سیاسی به‌ریتانیا بۆ ئه‌وه‌ی کاردانه‌وه‌ی باش له‌سه‌ر بارودۆخی کۆمه‌ڵگاکانی ‏خۆیان بکه‌ن."‏

شایانی باسه‌ نازم زه‌هاوی هاووڵاتیه‌کی به‌ریتانی به‌ڕه‌گه‌ز کورده‌ و خه‌ڵکی شاری خانه‌قینه‌. ناوبراو زیاتر له‌ 16 ‏ساڵه چالاکانه‌ له‌ بواری سیاسییه‌وه‌ کارده‌کات. له‌ نێوان ساڵانی 1994-2006 ئه‌ندامی ئه‌نجومه‌نی شاره‌وانیپه‌تنی بووه‌ .

له‌ ساڵی 2000 ماڵپه‌ڕی YouGov ی دامه‌زراندووه‌ که‌ ئێستا به‌ یه‌کێک له‌ ده‌زگا سه‌ره‌کییه‌کانی جیهانی ده‌ژمێردرێت له‌ بواری کۆکردنه‌وه‌ی زانیاری سیاسی و ئابووری و ڕاپرسی و لێکۆڵینه‌وه‌.‏

له‌ هه‌ڵبژرادنه‌کانی په‌رله‌مانی به‌ریتانیا که‌ له‌ سه‌ره‌تای ئه‌م مانگه‌ به‌ڕێوه‌چوو، نازم زه‌هاوی توانی سه‌رکه‌وتنێکی ‏گه‌وره‌ له‌ ستڕاتفۆرد ۆن ئه‌یڤن به‌سه‌ر ڕکابه‌ره‌کانی له‌ هه‌ردوو پارتی کرێکاران و لێبڕالی دیموکراتی و ‏به‌ده‌ستبێنێت ببێته‌ یه‌که‌م ئه‌ندامی کوردی په‌رله‌مانی به‌ریتانیا.‏
Top