ئاشكرایە گۆڕانكارییە سیاسی و ئابووریییەكان و سیستمی حوكمڕانییەكان، كاریگەریی راستەوخۆ دەكەنە سەر گۆڕانی ڕێچكە و سرووشت و مۆدیلی كاری میدیایی، هەرچەندە ئەوەی تا ئێستا لە جیهاندا پۆلێن كراوە و ناسراوە، سێ مۆدیلی میدیایە، ئەویش مۆدیلی میدیای حكوومی و بازرگانی و خزمەتگوزاریی گشتی، یان نیشتمانییە. لە هەرێمی كوردستاندا سەردەمی شاخ و شۆڕشی رزگاریخوازیی گەلەكەمان سەرەتای كاری میدیایی بووە، بۆیە میدیایەكی سیاسی و شۆڕشگێڕی بووە، دواتریش كە حكومەتی هەرێم راگەیەندراوە، ئەو جۆرە میدیایە لە میدیای حزبیدا خۆی بینیوەتەوە، واتە سەرەتا هەردوو حزبی باڵادەست میدیایان دامەزراندووە، یان درێژەیان بەو ئامرازانە داوە كە رۆژنامە و رادیۆ بوون و دواتریش تەلەفزیۆن و چەندین كەناڵی دیكەی میدیاییان هەبووە، دواتر دەرچوونی یاسای حزبەكان بە رەهایی مافی بوونی میدیا بە پارتی سیاسی دەدات، بە بێ دیاریكردنی ژمارە و چەندێتی و چۆنێتی، هەر حزبێك كە هەیە و دروست دەبێت، دەست بە دانانی كەناڵی جۆراوجۆری میدیایی دەكات، واتە تا ساڵانێك دوای راپەڕین لەم هەرێمەدا میدیا، میدیای حزبی بوو، دواتر لە دەرەنجامی قۆرخكاريی میدیای حزبی جۆرێك لە میدیای دیكە بە ناوی میدیای ئەهلی و سەربەخۆ سەری هەڵدا، ئەگەرچی من نامەوێت لەسەر هۆكاری پاشەكشەی میدیای ئەهلی باس و خواس بكەم، تەنیا دەمەوێت هۆكاری گەیشتنی ئەم قۆناغە كە من بە سەردەمی میدیای سێبەری دەزانم، باس بكەم. ئاشكرایە میدیای حزبی ئەگەرچی تا ئێستاش لەم هەرێمەدا بوونی هەیە، بەڵام هەر بە سەرهەڵدانی میدیای ئەهلی و دواتریش میدیای بازرگانی و میدیا لەژێر ناوی سەربەخۆدا، پارتە سیاسییەكان كەوتنە ئەوەی كە دەبێت میدیایەكیان هەبێت، كە هاوشێوەی ئەو جۆرانە لە میدیا بێت كە تا راددەیەك دەنگی خەڵكی ناڕازی تێدا دیار بێت، تاوەكو وەرگرەكانیان بەرەو لای میدیای ئۆپۆزسیۆن و میدیا ئەهلییەكان نەڕۆن، نەشدەكرا كەناڵە حزبییەكەیان نەمێنن كە زمانحاڵیان بوون، بۆیە كەوتنە داهێنان و دامەزراندنی چەند كەناڵێك كە ناڕاستەوخۆ لەژێر ناوی دیكەدا خزمەت بە سیاسەتەكانی ئەوان بكات، ئیتر ئەمە دەرگای كردەوە بۆ سەرهەڵدانی چەندین كەناڵ كە نەزانرێت هی كێن و بۆ چ ئامانجێك كاردەكەن، دواتریش دروستبوونی حزبی نوێ و سەرهەڵدانی باڵەكان لەناو حزبەكان ژینگەی بۆ تەشەنەی ئەم جۆرە لە میدیا فەراهەم كرد، ئێستاش ئێمە لە بارودۆخێكداین كە جگە لە هەردوو جۆری میدیای حزبی و سێبەر زیاتر ناتوانین پۆلێنی مۆدیلی میدیای وڵاتەكەمان بكەین. واتە مۆدیلی زاڵ ئەم دوو جۆرەن لە میدیا، كە بێگومانیش ململانێی پارتەكان و كێشەی ناوخۆیی هەندێك لە حزبەكان و دابەشبوون بۆ باڵەكان و پێویستبوون بە شەڕی میدیای شاراوە بە ناوی دیكەوە، زیاتر هاوكارێكی گەورەیە بۆ جۆری میدیای سێبەر لە بری میدیای حزبی، چونكە ئەو شەڕەی میدیای سێبەر دەیكات، هەرگیز بە میدیای حزبی لەژێرناوی حزبەكاندا ناكرێت و یاسا و بەرژەوەندیی حزبەكان رێگە بەو ململانێیە نادات.
كەواتە ماوە بڵێین: خۆری میدیای حزبی بەرەو ئاوابوونە و خۆری میدیای سێبەر لە هەڵهاتندایە، لێرەدا باسەكە ئەوە نییە كە كامیان باشن، بەڵام باسەكە لەوەدایە ئێمە هێشتا میدیامان رێكنەخستووە، كێ بەرپرسە لەم میدیایانە، كێ بەرپرسیارێتیی یاسایی و ئیتیكی ئەم كەناڵانە لە ئەستۆ دەگرێت؟ ئەگەر میدیای حزبی لەبەر بەرژەوەندییە سیاسییەكەی ئەركی تا راددەیەك نەتەوەیی لەئەستۆ دەگرێت، خۆ ئەم میدیایانە كە خاوەنەكانیان دیار نین، لەبەرچی ئەرك و بەرپرسیارێتی نەتەوەیی و هاووڵاتی و نیشتمانی لەئەستۆ دەگرن؟
ئەوەی من مەبەستمە باسی بكەم تایبەتمەندیی ئەو جۆرە لە میدیا نییە، چونكە ئەوە زۆری دەوێت، هیوادارم بابەتی توێژینەوە و لێكۆڵینەوە میدیاییەكانی داهاتوومان بێت، ئەوەندەی مەبەستمە دەمەوێت مەترسییەكانی هەژموونی ئەم میدیایە (میدیای سێبەر) لە چەند خاڵێكدا بخەمە روو:
1. ئەركی رێكخستنی میدیای ئاڵۆزتر كرد، كە ساڵانێكە هەوڵی بۆ دەدەین و هێشتا پێی نەگەیشتووین.
2. ئەم جۆرە لە میدیا نەك تەنیا دەرگا دەكاتەوە بۆ سەرهەڵدانی میدیای زیاتری سێبەر لەسەرئاستی ناوخۆ، ئەگەریشی زۆرە پاڵپشت و سپۆنسەری ئەم جۆرە لە میدیانە دەستی دەرەكی و بێگانەش بێت.
3. پرسی نەتەوە، نیشتمان، هاووڵاتی، هەرهەموویان لەبەردەم ئەم میدیایەدا دەكەونە بەردەم مەترسییەوە كە هیچ ئەرك و بەرپرسیاریەتییەكی دیار و دروستیان نەبووە.
4. ئاڵۆزكردنی زیاتری ژینگە میدیاییەكەمان.
5. دەرگاكردنەوە بۆ كاری زیاتری نائیتیكی و ناپیشەیی و پێشێلكاریی زیاتر بەرامبەر رۆژنامەنووسان.
6. تۆخكردنەوەی ململانێكان و دووركەوتنەوەمان لە پێكەوەژیان و ئاسایشی نیشتمانی و نەتەوەیی و كۆمەڵایەتی.