ناپاكى و بوێرى
May 7, 2018
وتار و بیروڕا
سەردەمانی پێشوو، تاڕادەیەك، ناپاكی بەدزی و شەرمەزارییەوە دەكرا، بەڵام ئێستا زۆر بە ئاشكراو بە شانازی و دەم گەرمیەوە ئەو كارە دەكەن و لەسەر شاشەی تەلەفزیۆنەكان بەتایبەتی كەناڵە عەرەبیەكان بە عەرەبیەكی شەق و شڕەوە دژایەتی گەلەكەیان دەكەن و هیچ ناسڵەمێنەوە.
ئەوەتا سەرەكفراكسیۆنی ڕەوتێكی كوردی زۆر بەئاشكراو بەخۆشحاڵییەوە لەسەر كەناڵێكی عەرەبی گلەیی لە برایانی شیعەی دەكات و پڕ بەزاری دەڵێ: بەداخەوە ئەوانە بەگوێی ئێمەیان نەكرد، دەنا ئێمە داوای داخستنی پەرلەمانی هەرێمی كوردستانمان دەكرد و داوای پشتگیریمان لەوان دەكرد كە مەخابن بە دەنگمانەوە نەهاتن و پشتیوانیان نەكردین.
جا سەیری ئەم لۆژیكە بەپێی وتەكانی ئەم زاتە برا عەرەبە شیعەكان زۆر لەمان كوردپەروەر و بە ئەمە تربوون بۆ پەرلەمان و هەرێمی كوردستان و نەیانویست ئەو ناپاكییە لە هەرێم و پەرلەمانەكەی كە بەخوێنی هەزاران شەهید و بریندار هاتۆتە كایەوە لەلایەن ئەوانەوە بكرێ و بەشداری لەو ناهەقی و زوڵمە لە هەرێمی كوردستان بكەن. ئەمە بەدانپێدانانی ئەو زاتە خۆی كە داخ و حەسرەت دەخوا لەو بێ هەڵوێستییەی ئەوان، دەنا دەمێك بوو قوفڵی هەتا هەتایی لە پەرلەمانی هەرێم درابوو.
ئەمە جگە لە دەیان نموونەی دیكە كە لە نووسینێكی وەهادا جێگای نابێتەوە. جا لەوە سەیرتر ئەوەیە ئەم جۆرە حزب و ڕەوتانە كە بە ئاشكرا دژی سەربەخۆیی و پەرلەمان و دامەزراوەكانی حكوومەتی هەرێم كار دەكەن، ئەوانە ئێستا داوای دەنگ لە هاووڵاتیانی هەرێم دەكەن بۆ ئەوەی بچنە بەغداو بە پشتیوانی نەیارانی هەرێم، هەرێم تێك و پێك بدەن.
داخۆ كێبێ دەنگ بەم جۆر و توخمانە بدات و ماڵی خۆی وێران بكات؟