سه باره ت به هه لبژاردن له كه ركووك
January 31, 2018
وتار و بیروڕا
چەندین ساڵە پارێزگای كەركووك دەیەوێ هەڵبژاردن بكات، بەڵام هەر جارەو حكوومەتی عێراقی بیانوویەكی بۆ دواخستنی دەدۆزییەوەو نەیدەهێشت ئەو هەڵبژاردنە بكرێت كە لە راستیدا هیچ پاساوێكی گونجاوی بەدەستەوە نەبوو، چونكە بارودۆخی نێو كەركووك زۆر هێمن و ئاسایش بەرقەرار بوو، كەچی هەر حكوومەت ملی بۆ ئەو داوایانەی ئەنجوومەنی پارێزگای كەركووك نەدەدا.
دیارە ئەمەش هۆكاری خۆی لە پشتەوە بوو، چونكە حكوومەت ئەو ڕاستییەی دەزانی كە هەر هەڵبژاردنێك بكرێ ئەوا كورد زۆرینە دەبێت و جومگە سەرەكییەكانی دەسەڵات لە كەركووك بەدەست دێنێت و شەرعیەت دەدات بەو ڕاستییەی كە حكوومەتە یەك لەدوای یەكەكانی بەغدا نكۆڵیان لێ دەكرد و بە هەموو شێوەیەك هەوڵیان دەدات ئەو ڕاستیە بشارنەوە، كە كەركووك شارێكی كوردستانیيەو زۆرینەی دانیشتوانی كوردن.
ئێستا كە دوای خیانەتی 16ی ئەكتۆبەر بارودۆخێكی نائاسایی و نایاسایی داگیركاری دەستی بەسەر ئەو شارە كوردییەدا گرتووە، حكوومەت كەوتۆتە پەلە بۆ ئەنجامدانی هەڵبژاردن چونكە بارودۆخەكە لە بەرژەوەندی خۆیەتی و دەیەوێ بەو پێیە واقیعێكی نوێ بەسەر ئەو شارەدا بسەپێنێت.
هەموو دەزانین لە دوای ئەو پیلانگیڕییەوە چۆن بەشێكی زۆر لە دانیشتوانی كورد لەو شارە دەربەدەركران كە بەسەدان هەزار كەس دەخەمڵێنرێت، ئەمە جگە لەو بارودۆخە نالەبارەی بەسەر كوردانی ئەو شارە و حزبە رەسەنەكانیدا هاتووە، كە بەهەموو پێوەرێك لە بەرژەوەندی كوردانی ئەو شارە و كوردستانیبوونی ئەو شارە نییە، بۆیە دەبێت بەهەر شێوەیەك بێت نەهێڵدرێت ئەو هەڵبژاردنە لەژێر پۆستاڵی داگیركاریدا بەڕێوەبچێت، چونكە ئەنجامەكانی بە روون و ئاشكرا دیارن.
ئەوەتا ئەو پارێزگارە بە وەكالەتەی ئێستا ڕۆژانە لە هەوڵ دایە بۆ گۆڕینی دیمۆگرافیای ئەو شارەو نەهێشتنی سیمای كوردی بەو شارەوە كە لە هەموو رووێكەوە ئێستا دیارە.
بۆیە دەبێ پەرلەمانتارە كوردەكانی نێو ئەنجوومەنی نوێنەرانی عێراق، ئەوانەی كە خوسڵەتی كورد و نیشتیمانپەروەرانەی خۆیان لەو ئەنجوومەنەدا پاراستووە كاری جیددی بكەن بۆ ئەوەی نەهێڵن پەرلەمان ئەو بڕیارە بدات، كە هەڵبژاردن لەكەركووك بكرێت، گەر هەر بە زۆرەملێش ئەو بڕیارەیان دا، ئەوا ئەمان هەڵوێستی بەرامبەر وەربگرن و بە ئاشكرا بڵێن هەموو هەڵبژاردنێك لە ژێر دۆخی داگیركاریدا رەتدەكەینەوەو دانی پێدا نانێین، هەروەك دەبێت حزبە كوردییەكانی هەرێمیش هەڵوێستی نیشتیمانپەروەرانە لەو هەڵبژاردنە وەربگرن و نەكەونە نێو تەڵەی حكوومەتی عێراقیەوە، چونكە وەك وتمان ئەنجامی ئەو هەڵبژاردنە هیچ لە بەرژەوەندی كورد و حكوومەتی هەرێمدا نابێت، تەنها رەوایەتی بە داگیركاری و سیاسەتی بە زۆرەملێ و خۆسەپاندن دەدات و هیچی تر.