حكوومەتی عێراقی لەسەرەتای باسكردنی دۆزینەوەی چارەسەرێكی گونجاو بۆ كێشەكانی نێوان هەرێم و بەغدا كاردانەوەی هێندە توند نەبوو وەك لەدواییدا بینرا، تەنانەت سیاسییەكانی بەغدا زۆر بە نەرمی و تێگەیشتنەوە لە چارەسەری گونجاو دەگەڕان و تەنانەت باسكردنی جیابوونەوەی ئاشتیانەو پێكەوە ژیان وەك دوو دراوسێ تا ڕادەیەك لای زۆربەیان هەزم دەكرا، بەڵام كاتێك هەڵوێستی ئەوروپا و ئەمریكایان دیت كە دژ بە ڕیفراندۆم وەستا، ئەوانیش یەكسەر هەڵوێستیان بە تەواوەتی گۆڕدرا، هەرچەند جیاوازییەكی زۆر هەبوو لەنێوان تێڕوانینی ئەوروپا و ئەمەریكا لەگەڵ بۆچوونی حكوومەتی عێراقدا، ئەوان دژی ڕیفراندۆم نەبوون وەكو پرنسیپ، چونكە ئەو وڵاتانە خۆیان لەزۆر مەسەلەدا پەنا بۆ ڕیفراندۆم دەبەن و بەكارێكی دیموكراتی و مافێكی سروشتی گەلانی دەزانن، بەڵام ئەوان زیاتر مەبەستیان لەدژایەتی ڕیفراندۆم لەسەر كاتەكەی بوو كە ئەوان لەدیدی خۆیانەوە بە گونجاویان دانەدەناو وایان لێكدەدایەوە كە ئەو ڕیفراندۆمە كاری نەرێنی دەكاتەسەر شەڕی داعش، كە لەڕاستیدا ئەوە دوو مەسەلەی جیاواز و هیچ پەیوەندییەكی وا گرنگی پێكەوە نەبوو كە كاربكاتە سەر شەڕ دژ بەداعش، چونكە لەڕاستیدا داعش بەرەو كۆتایی دەچوو هەروەك كەوتن و شكستیان بە ئاشكرا دیاربوو، بەڵام حكوومەتی عێراقی سوودی زۆری لەو هەڵوێستەی ئەوان وەرگرت و بەشێوەیەك خوێندنەوەی بۆ دەكرد گوایە ئەوانیش وەك حكوومەتی عێراق كە »دیموكراسی بۆ هەزم ناكرێ«، دژی ڕیفراندۆمن بۆیە تا دەهات، دوای ڕیفراندۆم، هەڵوێستی بەرامبەر هەرێم توندتر دەكرد تا كار گەیشتە ڕادەی ئابڵوقەیەكی بەرفراوان بخاتە سەر هەرێم و فڕۆكەخانەو داوای خاڵە سنوورییەكان لە هەرێم بكات كە دەبێ ڕادەستی حكوومەتی عێراقی بكرێ كە لە خودی دەستووری عێراقیدا دەڵێ، دەبێت بەهاوبەشی بەڕێوەببرێت.
بەڵام كاتێك عێراق دۆڵپێچی لەسەر هەرێم سەختر دەكرد كەچی بەپێچەوانەوە، ئەوروپا هەڵوێستێكی زیاتر ئەرێنی بەرامبەر هەرێم نیشان دا، ئەوەبوو فەڕەنسا دەستپێشخەری خۆی كرد و داوەتی سەرۆكوەزیرانی هەرێم و جێگرەكەی بۆ فەڕەنسا كرد، بەمەش ئابلوقەی لەسەر هەرێم شكاند كە مایەی قەدر زانی هەرێمە، هەروەك دوای ئەوە ئەڵمانیاش بەداوەتی سەرۆكوەزیران و جێگرەكەی ئەوانیش هەڵوێستی ئەرێنی خۆیان نیشاندا، هەروەك وەزیری دەرەوەی ئەڵمانیاش بەهۆی ناڕازی حكوومەتی عێراقەوە كە سەردانی هەرێم بكات ئەو سەردانەكەی لەغوكرد، هەروەك چۆن لەمەودوا وەزیری بەرگری بەلجیكا هەمان هەڵوێستی لەسەردانی بەغدا وەرگرت.
ئێستا لە گەورەترین مەرجەعی كریستیانەكان، لە ڤاتیكان، پێشوازی لە سەرۆكوەزیرانی هەرێم دەكرێ كە ئەوە نیشاندانی پشتیوانیەكی بەرچاوە لە هەرێم كە عێراق چاوەڕوانی نەدەكرد.
وەك بڕیاریشە هەر لەم نزیكانەدا شاندێكی باڵای هەرێم سەردانی بەریتانیا بكات و چاویان بە گەورە بەرپرسانی ئەو وڵاتە بكەوێت كەواتە سیاسەتی دۆڵپێچی بەغدا سەركەوتوو نەبوو، بەڵكو كردنەوەی ئەوروپا و جیهانی دیموكراتی بەدوای خۆیدا هێنا.
بۆیە بەردەوامبوونی ئەم دۆڵپێچە تەنها سیمای بەغدا بەرامبەر جیهانی شارستانی و دیموكراتی دزێوتر دەكات و هیچی دیكە.