به ڵێنی بێ به رهه م
January 14, 2018
وتار و بیروڕا
لەم خوتبانەیدا كۆمەڵێك داتای دوور لەڕاستی و زانستی دەخاتەڕوو بەتایبەت سەبارەت بە هەناردەكردنی نەوت بۆ دەرەوە كە تەنها دەبێتە مایەی چەواشەكاری بۆ دانیشتوانی هەرێم و نیگەرانكردنی گەلانی عێراق، چونكە ئەو حساباتانەی ئەو بەڕێزە بۆ نەوتی هەرێم دەیكات لەگەڵ واقیعی ئەو پڕۆسەیەدا زۆر دوورن لەیەك، چونكە ئەو تەنها سەیری ژمارە بەرمیلە نەوتی هەناردە دەكات و بە نرخی ڕۆژ حسابی بۆ دەكات كە ئەمە بە كردارەكی ژمارەی قەبەكراو و هەڵە پێشكەش بە گوێگرانی دەكات. هەرچەند چەندجارێك هەرێم وەڵامی ئەو بانگەشانەی داوەتەوەو ژمارەی ئاشكرای دەرخستووە، لەگەڵ ئەوەشدا بۆ هەفتەی داهاتوو هەمان ژمارەی هەڵە پێشكەش دەكات و ڕاستییەكان پشتگوێ دەخات. ئەو نایەت ڕاستی و دروستی ئەو پڕۆسەیە ئاشكرا بكات و تەنها حساب بۆ ژمارە و نرخ دەكات و هیچ حسابێك بۆ بەشداری كۆمپانیەكان و قەرزەكانیان ناكات و هەروەك ئەو ڕاستیەش دادەپۆشی كە نەوتی هەرێم لە بازاڕدا بەنرخی كەمتر دەفرۆشێ و بەوپێیەش داهاتەكەی زۆر لەوە كەمتر دەبێ كە سەرەكوەزیران بە حاسیبە حسابی بۆ دەكات. هۆكاری ئەمەش هەر ئەوەیە كە ئەو پڕۆسەیە كە بەرچاوی دانیشتوان، هەرێم گوماناوی بكات و بەوپێیەش سوود لە كەم مووچەیی و دواكەوتنی مووچە وەربگرێت و خەڵكەكە بۆ دەربڕینی ناڕەزایی، بەرامبەر هەرێم هانبدات، كە بەداخەوە لەلایەن هەندێ خەڵك و هەندێك لەو حزبانەی خۆیان وەك موعارەزە نیشاندەدەن پشتیوانی دەكرێ و وەك زانیاری ڕاست لەڕێی میدیاكانیانەوە دەیكەنە چەك و بەرامبەر حكومەتی هەرێم دەیخەنەگەڕ كە تەنها زەرەر بە هەرێم دەگەێنێت.
داتاكانی نەوتی هەرێم وەك وەزیری وزەی توركیا دەڵێت كە نەوتی هەرێم لەوێوە هەناردە دەكرێ ئاشكرایەو حكوومەتی توركیا هەموو جارێك بەژمارە لەهەناردەو فرۆشی ئاگاداری بەغدا و هەرێم و خۆشیان دەكات كە ئەمەش پڕۆسەیەكی ئاشكرایە و هیچ نادیارییەكی پێوەدیار نییە.
ئەگەر مەسەلەی داهاتی سنورەكانی هەرێمیشە ئەوا حكومەتی هەرێم ئامادەگی نیشانداوە كە نوێنەری بەغدا لەو سنوورانە ئامادەبن و ئاگایان لە چوون و هاتنی كاڵاكان و داهاتەكانی ببێ هەروەك سەبارەت بە فڕۆكەخانەكانیش ئەوە بەئاسانی دەكرێ، بۆیە حكوومەتی بەغدا-دەتوانێ گەر بەڕاستی دەیەوێت-لەكۆی بودجەی هەرێم ببڕێت و باقیاتی بنێرێت نەك ئیتر هەموو هەفتەیەك هەگبەیەك بەڵێنی بێ بەرهەم بۆ هەرێم بنێرێ.