لێدوانێكی مالكی بە فراوانی بڵاوبۆتەوە كە تێیدا بۆ لایەنگرەكانی قسە دەكا و (بالحرف الواحد) دەڵێ: ( اذا تاسست دولة كردستان، ایران ما راح تستقر، و بهذا ينضرب محور التشییع كلها) واتا (ئەگەر دەوڵەتی كوردستان دروست بوو، سەقامگیریی ئێران تێكدەچێ، ئەوەش لێدانی كۆی میحوەری شیعەیە)!!
ئەمە خيتابی راستەقینە و راستگۆیانە و راشكاوانەی نوخبەی شیعەی دەسەڵاتداری بەغدایە و لە راستیدا شۆڕیش بۆتەوە بۆ نێو شەقام و رای گشتی شیعەی عێراق. ووڵات و مەرجەع و قیبلە و سەرزەمینی دڵخوازی ئەوان ئێرانە، ئەوان هیچ ئینتما و وەلائێكیان بۆ شتێك نییە بە ناوی عێراق، داكۆكی ئەوان لە عێراق داكۆكییە لە بەشێك لە خاكی ئێران و ئومەمیەتی شیعەگەرایی. وەك چۆن ئێمەش لەوەتای هەین عێراق ووڵاتمان نەبووە و ئینتمامان بۆی نەبووە و بەشێك نەبوین لە ئوممەی عێراقی وەهمی و هەمیشە كورد و كوردستانی بووین.
هەر لە دەسپێكی دامەزراندنیەوە، شتێكی حەقیقی نەبووە بە ناوی عێراق. ئەم دەوڵەتە دەستكردە لە پێكهاتەگەلێكی بە زۆر پێكەوە لكێنراو و بە زۆرەملێی ئینگلیز و ئیستعماری كۆن دروستكراوە. نە كوردی بێ بەشكراو لە مافی چارەنووس ئینتیمای بۆ هەبووە، نە عەرەبی شیعە و سوننە.
تا عەرەبی سوننە دەسەڵاتدار بوون، ئینتیما بۆ عێراق جۆرێك بوو لە عەیبە و شعوبیەت، دەبوا ئینتیما بۆ نەتەوە و نیشتمانی عەرەب بێت، لە دنیابینیی بەعسدا عێراق ووڵات نەبوو، (قطر)ێك بوو لە (اقطار)ی نیشتمانی دابەشكراوی عەرەب! عێراق سوخرەكێش و كەرەستەیەكی دەوڵەمەند بوو لە خزمەتی عروبە و دۆزی ئوممەی عەرەبیدا. پارێزەری بەوابەی شەرقی عەرەب بوو.
كە شیعە هاتنە سەركار، عێراق بووە تابع و مورید و موخلیسی ئەو ئیرانەی كە قیبلە و مەنار و دایكی كۆكەرەوەی شیعەگەراییە. عێراق بووە سوخرەكێش و كەرەستەیەكی دەوڵەمەند بۆ خزمەتی شیعەگەرایی و دۆزی ئوممەمیەتی شیعە، بوو بە حەدیقەی خەلفی ئێرانی دایك.
مالكی راست دەكات، سەربەخۆیی كوردستان ئیستقراری ئێرانێك دەشێوێنێ كە هەیە و مەوجودە، نەك عێراقێك كە وجودی نییە تا ئیستقراری هەبێت و بشێوێت.
حەق وایە ئیدی لەیەكتر ئاشكرا بین و ناوچەكە و جیهانیش هاوكێشەكە وەك هەیە بخوێننەوە و دوای وەهم نەكەون. ئێمەی كوردستانییان لە بەشێكی قەڵەمڕەوی ئێران جیادەبینەوە كە لەسەر كاغەز هێشتا پێیدەڵێن عێراق و تایەفەیەكی شیعەی عەرەب بە وەكالەتی ئیران لە پایتەختەكەیدا حوكم ئەكەن.
ئێران و وەكیلەكانی لە عێراق هەرچەندی لەم پێشهاتە توند و توڕە بن، كەمە، بەڵام توڕەیی توركیا و ناڕەزایی عەرەب و ئەمریكا و ئەوروپا، زۆر بە زەحمەت تەفسیر دەكرێ.