لێكجیابونەوەی كوردستان و عێراق بە لێكگەیشتن، پێویستی بە وجودی ناوەندی بڕیاردەر هەیە هەم لە كوردستان و هەم لە عێراق. لە دوایین سەفەری وەفدی حكمەتی هەرێم بۆ بەغدا سەرەتاكانی زەمینەسازیی بۆ ئەو لێكگەیشتنە لە نێوان هەولێر و بەغدا تاوتوێكرا. تێكڕای ئەو روداوانەی لە بەغدا و لە كوردستانیش دەگوزەرێ، پیلانی تاقمی مالكی و شۆڤێنییەكانی دەوروپشتی پەسیجی شەعبی و حیزب و باڵە سیاسییە دەستتێكەڵەكانی كوردە بۆ نەهێشتنی ناوەندی بڕیار لە هەردوو پایتەخت و رێگرتن لە دابەشكردنی عێراق، هێزێكی ئیقلیمی دیارییش سەرمەشق و رێكخەر و رێنوێنی كۆی پیلانەكەیە.
لە بەغدا باڵی شیعەی مالكی كە تا بینەقاقای غەرقی گەندەڵییە، بە خۆی و بە ( سوننەی مالكی ) و ( كوردی مالكی) بە ناوی دژایەتی گەندەڵی، خەریكی بنكۆڵكردنی حكومەتی عەببادین و یەك بەیەك وەزیرەكانی كابینەكەی لەكار دەخەن تا دەگاتە سەری خۆی و هەموو ئەوەش بە ئامانجی كۆتایی هێنان بە ناوەندی بڕیار لە بەغدا و دروستبونی بۆشایی و گەڕانەوەی ئەو مالكییەی كە دوژمنی سەرسەختی ئاواتەكەی بارزانی و سەربەخۆیی كوردستانە. بەرەی ( كوردی مالكی) جیا لەو دەورەی لە بەغدا پێیان سپێردراوە، لە كوردستانیش لە ژێر پەردەی خەمخۆریی بۆ بێموچەیی خەڵك و پشتیوانی خۆپیشاندان، دەیانەوێ حكومەتی هەرێم بنكۆڵ بكەن و كوردستان بشێوێنن و بە هەڕەشەی كشانەوە، حكومەت بخەنە بەر فشار و بە خەیاڵی خۆیان لە كۆتاییدا ناوەندی بڕیار لە كوردستانیش بە دەردی بەغدا ببەن. دواجاریش هاوپەیمانیی نێودەوڵەتی نە لە بەغدا و نە لە هەرێم نەزانێ لەگەڵ كێ هەماهەنگی بكات و هەموو كارەكانی لێ تێكبچێ و بەوەش ئامانجی هێزە ئیقلیمییەكە بێتەدی.
ئەو هێزە ئیقلیمییەی ئەم نەخشەیەی داڕشتووە، دەیەوێت هەماهەنگیی نێوان عێراق و كوردستان و هاوپەیمانی نێودەوڵەتی لەسەر شەڕی داعش و سەرەتاكانی تەفاهومی نێوان بەغدا و هەولێر بۆ دەستلێكبەردانی ئاشتییانە تێك بدات. مالكی بە دافعی گەڕانەوە بۆ دەسەڵات و ( كوردی مالكی)یش بە دافعی رقی مێژوییان بەرامبەر بارزانی بەوپەڕی ئیخلاسەوە جێبەجێكاری نەخشەكەن. هەر لەم پێودانگەشەوەیە كە هاوپەیمانان وەك پارتی بە گومانەوە لە رەفتاری حیزب و باڵەكانی بەرەی (كوردی مالكی) و هەوڵەكانیان بۆ گواستنەوەی ئاژاوە و پاشاگەردانیی سلێمانی بۆ هەولێر و دهۆك دەڕوانن و لە رێگرییەكانی پارتی تێدەگەن و لەوەش دڵنیان كە ئەگەر دەست و دەسیسەی سیاسی نەبێت، هیچ میللەتێك لە كاتی شەڕدا فەرمانگە خزمەتگوزارییەكانی خۆی ئیفلیج ناكات.
مەرامی ئێستای مالكییەكان رێگرتنە لە ئۆپەراسۆنی ئازادكردنی موسڵ، ئەو ئازادكردنەی سەنگی سەربازیی و سیاسیی سەرۆك بارزانی و حكومەتەكەی عەببادی وەك دوو لایەنی هەماهەنگ لەگەڵ هاوپەیمانیی نێودەوڵەتی بەهێز تردەكات، ئەوانیش دەستبەتاڵ لێی دەردەچن و هەموو ئەو راستییانەش دەردەكەون كە موسڵ لە لایەن مالكییەوە چۆن بەدەستەوەدراو بە بڕیاری كێ و بۆ چ مەبەستێك.
ئەم سیاسەتە ئیقلیمییە كە پێشتر ووڵاتێكی وەك لوبنانی بێ ئیفلیج كرا، دەبێ لە كوردستان و عێراق سەرنەگرێ. ئیرادەی هاوپەیمانیی نێودەوڵەتی و سەرۆك بارزانی و حكومەتەكەی عەبادیش بەهێزە بۆ ڕێگرتن لەم نەخشە ژەهراوییەی كە ئەگەر رێی لێنەگیرێ، گەلی كوردستان زەرەرمەندی یەكەمی دەبێت و ریسی هاوپەیمانانیش دەكاتەوە بە خوری و سەری عەببادیش بە با دەدا.
سیاسەتی سەربەخۆییخوازیی سەرۆك بارزانی و پارتی بەردەوام دەبێت تا سەركەوتن. كوردستان و عێراق بە لێكگەیشتن دەست لێك بەردەدەن و دەبنە دوو هاوسێی باش. حكومەتی هەرێم بەرقەرار دەمێنێ و سیناریۆی بەغدا لە هەولێر دوبارە نابێتەوە. خەڵكیش رۆژ بە رۆژ راستییەكان روونتر دەبینن. لە كۆتاییدا بەرەی سەربەخۆییخوازی و ئیرادەی گەلی كوردستان سەردەكەوێ و بەرەی ( كوردی مالكی) بە مالكی و فەتلاویشەوە لە پەراوێزی مێژوودا دەپوكێنەوە.