لە ئەنجامی زۆربوونی كێشە ژینگەییەكان لای خۆمان وەك ئەوەی لەجیهاندا روویدا پێش دەیان ساڵ لەگەڵ دەركەوتنی شوێنەواری جەنگەكان و خراپ بەرەوپێشچوونی پیشەسازی و بیناسازی و داهێنانی چەندین مەكینەو دروستكردنی زۆرێك لە كارگەی نایاسایی و زیادبوونی لە رادەبەدەری هۆكارەكانی گواستنەوە، زیادبوونی ژمارەی دانیشتووان و بەكارهێنانی بێ سنووری پێكهاتەكانی ژینگە و گوێنەدان بە چارەنووسی نەوەكانی ئایندە و زیادبوونی زۆری رووبەری خانووبەرە و كەمبوونەوەی رووبەری سەوزایی و كشانی ئاسۆیی شارەكان و زیادبوونی دەنگ و ژاوەژاوی كارگە و هۆكارەكانی گواستنەوە و تێكئاڵانی دیمەنە ناهۆرمۆنییەكان و تێكدانی هەستی بینین، كەمیی هۆشیاریی ژینگەیی و بایەخ نەدان بە شوێنەوارەكانی پڕۆژە ئەنجامدراوەكان و. هتد.
هەموو ئەمانە ئەوسا پاڵی بە زۆرێك لە توێژەر و كاربەدەست و هاوڕێیانی ژینگەوە ناوە كە هەڵوەستەیەك بكەن لەئاست ئەم كێشە زۆرانەدا، بۆیە دەنگی ناڕەزایی و هاواری ترسناكیی و ئاگاداركردنەوە لە زۆر لاوە بڵند بووە، بۆ بەرجەستەكردنی ئەم خەمخواردنەش تادێت دەستە و كۆمەڵە و گروپ و لیژنە و وەزارەتی تایبەت بە ژینگە لە وڵاتان دێنەئاراوە، بەجۆرێك كە ڕۆژ نییە لە دەزگاكانی راگەیاندن، یان گۆڤار و بڵاوكراوە تایبەتەكانەوە باس لە پیسبوونی ژینگە و مەترسییەكانی پیسبوون نەكرێت.
هەرێمی ئێمەش لەسایەی دەستكردن بە پەرەپێدانی فراوان واچاوەڕوان دەكرێت لەماوەی ساڵانی داهاتوودا بەشێوەیەكی بەرچاو گرفتەكانی پیسبوونی تێدا دەربكەوێت، پاش گۆڕانی بەرەو ژینگەیەكی قەرەباڵغ و پڕبوونی شارەكانی بە دانیشتووان و شەقامەكانیش بە هۆكارەكانی گواستنەوە، زیادەڕەوی لە بەكارهێنانی سامانی سروشتی، بەكاربردنی بێ پلانی زانستی و ئاستێكی بەرزی هۆشیاری ژینگەیی و ژینگەی رۆشنبیرییدا.
بۆیە ئەركی پاراستنی ژینگە و چاككردنی، ئەركێكی نیشتمانی و مرۆییە، لەهەمانكاتیشدا ئەركێكی ناوخۆیی و جیهانییە، هەروەك ئەركی تاك و كۆمەڵگەشە لەهەمانكاتدا.
پسپۆڕان و كاربەدەستانی بواری ژینگە ئەمڕۆ لەجاران زیاتر ئەركی هۆشیاركردنەوە و ئامادەكردنی باس و لێكۆڵینەوە و ئەنجامدانی ئەو میكانیزمەیان دەكەوێتەئەستۆ، كە دەتوانرێت بە هۆیانەوە شوێنەوارەكانی ماددە پیسكارەكانی ژینگە نەهێڵن، یان كەم بكرێنەوە.
پیسبوونی ژینگە ئەمڕۆ بۆتە یەكێك لەو هۆكارانەی كە ئاسایشی گشت جیهانی خستۆتە بەر هەڕەشە و مەترسییەوە، چونكە پیسبوونی ژینگە سنوورە سیاسی و ئیدارییە دەستكردەكان ناناسێت و پیسبوونی پێكهێنەرەكانی لەهەر شوێنێكی دنیادا، كاریگەریی خراپی دەبێت لەسەر شوێنەكانی تریش لەجیهاندا.
ئێمەش كە بەشێكین لەم دنیایە و لەسەر یەك خاك دەژین و یەك چارەنووس لەگەڵ تەواوی جیهاندا كۆمان دەكاتەوە، ئەركی سەرشانی هەر یەكەمانە بەپێی تواناو لە سنووری زانیارییەكانی خۆی و پێگەی بەرپرسیارێتی خۆیدا، هەنگاوێك بنێت لە ڕێگەی دوور و درێژی پاراستن و چاككردنی ژینگەدا.
لەبەر گرنگیی پاراستن و چاككردنی ژینگە و بەمەبەستی پەرەپێدانی هۆشیاریی ژینگەیی و قەرەبووكردنەوەی ئەو زیانانەی بە ژینگەمان گەیشتوون، باش وایە ناوەندەكانی خوێندن ئارەزوومەندانە ماوەی خوێندنی ئەمساڵ بە ساڵی ژینگە ناو بنێن لە خوێندنگە و قوتابخانەكاندا و زنجیرە چالاكییەك رابگەیەنن لەم بوارەدا وەك ئەم چالاكییانەی لای خوارەوە:
1- پێشبڕكییەك بۆ هەڵبژاردنی باشترین دیزاینی لۆگۆ و دروشمی ساڵی ژینگە لە قوتابخانەكەدا.
2- خەڵاتی باشترین سێ پێشنیازی كرداری بۆ جوانكردنی ژینگەی قوتابخانە.
3- سازكردنی پێشبڕكێی دووبارە بەكارهێنانەوەی شتومەكەكان.
4- رێكخستنی كۆنفرانسێكی زانستی لە رۆژی ژینگەی كوردستاندا لە (16)ی مانگی نیسانی (2017).
5- رێكخستنی پێشبڕكییەك بۆ باشترین سێ پڕۆژەی كورتە فیلمی (5) خولەكی لەبارەی ژینگەوە.
6- پێشبڕكییەك بۆ هەڵبژاردنی باشترین سێ چالاكی هونەری و ئەدەبی تایبەت بەمنداڵان.
7- رێكخستنی پێشانگەیەك بۆ ئەو بەرهەم و ئامێر و پێداویستییانەی كە هاوڕێی ژینگەن.
8- دروستكردنی كتێبخانەیەكی بچووكی ژینگەیی و هاندانی قوتابیان بۆ پڕكردنەوەی بە كتێب و گۆڤارە ژینگەییەكان.
9- رێكخستنی پێشبڕكێی پاكترین و جوانترین سێ پۆلی قوتابخانە بەپێی پێوەر و ستانداردە ژینگەییەكان .
10- هەڵبژاردنی باشترین سێ رێكخەری كەمپینی ژینگەیی تایبەت بە بوارێكی دیاركراوی ژینگە لە قوتابخانەدا.
11- خەڵاتی باشترین سێ توێژینەوەی ژینگەیی بۆ قوتابیان وخوێندكاران.
12- پێشبڕكێیەك بۆ هەڵبژاردنی چالاكترین سێ مامۆستا لە بواری پاراستنی ژینگەی قوتابخانەدا.
تێبینی:
وەك میكانیزمێكی كردارییش بۆ ئاگاداربوون و سەرپەرشتیكردنی ئەم هەڵمەت و چالاكییانە وا باشە بەڕێوەبەرایەتی قوتابخانە دەستەیەكی سەرپەرشتیار و ناوبژیوانی لە (3) مامۆستای قوتابخانە دیار بكات.