یەك لە گۆرانییە خۆشەكانی ماملێی مەزن، شاری دڵ-ە. شیعری گۆرانییەكە، هی شاعیر سەید كامیلی ئیمامییە. گفتوگۆیەكی شاعیرانەیە لە نێوان سۆز و عەقڵی شاعیردا لەبارەی گەڕانەوە، یان نەگەڕانەوە بۆ دنیای عەشق و دڵداری كە شاری دڵە. لە دوا دێڕدا دەڵێت:
لەم هەموو چوون و نەچوونە، سەری سوڕماوە كامیل
من دەڵێم جوانە بچم، ئەو دەڵێ وا جوانە نەچی
لەوەتەی نەوشیروان مستەفا، بەداخەوە، بەشێكی سەركردایەتی یەكێتیشی لەگەڵ خۆیدا خستووەتەوە سەر كەڵكەڵەی چوونەوە و نەچوونەوە بۆ بەغدا، ئەو گۆرانییە خۆشەی ماملێ زەینم جێناهێڵێت. وەلێ دەبێت بە هەموو هونەر و جوانیپەروەران، بەتایبەتی عاشقانی هونەری ماملێ بڵێم: ببورن، ئەڵبەت بە هیچ كلۆجێك، بەراورد و لێكچوواندن ناكەم لە نێوان ئەو چوون و نەچوونە جوانەی كامیل و ماملێدا، لەگەڵ ئەم چوون و نەچوونە ناجۆرەی چەند پەرلەمانتارێكی كورد بۆ بەغدا، تەنیا لە ڕووی داڕشتنی زمانەوانییەوە نەبێت. ئاخر ئەویان هونەرێكی باڵای كامیل و ماملێیە، ئەمیان، خزانەوەیەكی تری دەروونیی نەوشیروان مستەفایە.
ئەم بەیانییە(یەكشەممە)، دیسان، مەسەلەی چوون و نەچوونەكەی بەغدا سەریهەڵدایەوە. ئەندامێكی ئەنجوومەنی نوێنەرانی عێراق لە لیستی یەكێتی نیشتیمانی كوردستان، بە تەلەڤیزیۆنێكی كوردیی ڕاگەیاند، هەردوو فراكسیۆنی، یەكێتی و گۆڕان(جاران)، دەچنەوە بەغدا. ئاماژەشی دا كە ئەوان وەك (نوێنەرانی) خەڵكی كوردستان لە بەغدا، نابێت خەڵكی كوردستان چاوەڕێی شتی گەورەیان لێ بكەن، چونكە وەك خۆی گوتی: ئێمە دەچینەوە بەغدایەك، حەشدێكی لێیە ئەوەندە میلیشیای لە خۆ گرتووە.
قسەكەی ئەم پەرلەمانتارە، سەرنجی زۆر هەڵدەگرێت، نەك لەبەر ئەوەی گرینگە و شتێكی كەس نەگوتووەی گوتووە، نا، لەبەر ئەوەی زۆر بە سادەیی، باسی یەكەمین هەنگاوی كردەنی دەكات بۆ لێكترازانی ڕیزی نیشتیمانیی كوردستان و فراوانكردنی كەلێنی ناكۆكییەكانمان لە بەرانبەر بەغدادا. هەنگاوێك، كوردستان ڕووبەڕووی مەترسیی گەورە، داگیركەرانیش، لە بەغدا و ئەنقەرە و تاران و شام، شاگەشكە دەكات.
جارێ نازانرێ، ئەم برا بەڕێزە و زۆر خەڵكی تریش، باسی دوو حزب و دوو فراكسیۆن و هاوپەیمانیی چی دەكەن؟ ڕاستییەكەی، یەك فراكسیۆنە، چونكە ناوەكەی، نەبێت كە ئەویش بۆ گەمەی حزبییە، دەنا گۆڕان نەماوە، تەنیا ڕێوڕەسمی كفنودفنەكەی ماوە. گۆڕان، تەنیا لە زەینی ئەو دەیان هەزار گەنجە داماوەدا هێڵدراوەتەوە كە گەلێك بەڵێنی ئاڵوواڵایان پێدرا، زۆر درووشمی قەبەیان دەرخواردرا. ئاخر هەر دەدوازدە ڕۆژێك دەبێت، بەڕێز جەمیل هەورامی، ئەندامی سەركردایەتی یەكێتی، لە دیداری ڕۆژنامەیەكی كوردیدا، دەڵێت: یەكگرتنەوەی یەكێتی و گۆڕان تەواو بووە، تەنیا لەسەر هەندێك پرسی دارایی ماوە. ئیتر نازانم، ئەم برادەرانە، دوو فراكسیۆن و گۆڕان گۆڕانی چییانە؟
ڕاستتان دەوێت، ئێستێ حزبێك هەیە ناوی یەكێتی نیشتیمانی كوردستانە، ئەوەی ماوە؛ ڕاگەیاندنی ڕەسمی یەكگرتنەوەكە و پێگەی نەوشیروان و برادەرەكانێتی لە هەرەمی دەسەڵاتی یەكێتیدا. دەنا گۆڕان، پرۆژەیەكی سیاسی نەوشیروان مستەفا بوو كۆتاییهات. شاردنەوەی ئەم ڕاستینەیەش، لەبەر دوو هۆكارە: بەردەوامبوون لەسەر فریودانی ئەو گەنجانەی پێیانوابوو نەوشیروان بەڕاستێتی و دوایكەوتبوون. دووەمیش، ئەو كادیر و ئەندام و لایەنگرانەی یەكێتین(كە ڕێژەیەكی زۆرن) بە هاتنەوە و باڵادەستیی نەوشیروان لە نێو حزبەكەیاندا ڕازی نین. مەسەلەی داراییش، لەولاوە بوەستێت، وەك كاك جەمیل هەورامی ئاماژەی پێكردووە.
باسی ئەو موغالەتەیەش مەكەن كاتێك ئەو برادەرە پەرلەمانتارەی بەغدا دەڵێت: ئێمە وەك نوێنەرانی خەڵكی كوردستان! ئەمە هەڵە و ئیشكالییەتێكە تا ئەمڕۆ چارەسەر نەكراوە. نوێنەری خەڵكی كوردستان، داوودەزگەكانی هەرێمی كوردستانن، سەرۆكایەتی هەرێم، پەرلەمانی كوردستان، حكوومەتی كوردستان. چ ئەندامانی كوردستانیی ئەنجوومەنی نوێنەرانی عێراق، چ هەموو وەزیر و كاربەدەستانمان لە بەغدا، نوێنەری خەڵكی كوردستان نین، پشكى كوردستانن لە داوودەزگە فیدرالییەكانی عێراقدا.
دوایی، ئەم پەرلەمانتارەی یەكێتی، خۆی باسی گەڕانەوە بۆ بەغدایەك دەكات كە حەشدی شەعبی تێیدا باڵادەستە، "وما أدراك ما الحشد الشعبی". باشە خوشكوبرایانی بەڕێز كە خۆتان دەزانن ئەمە بەغدایە، بۆ كوێ دەچنەوە و بۆچی دوای قسەی نەوشیروان مستەفا كەوتوون؟
"نەوشیروان" دەڵێ مەسكەن و ئارامگەی جانانە دەچم
"خەڵك" دەڵێ سەربەسەری تێكچووە وێرانە نەچی
لەگەڵ داوای لێبوورن لە كامیل و ماملێ.
بمێنن بەخێر.