لە یەكێك لە مزگەوتەكانی تارانەوە، جێگری فەرماندەی سوپای پاسدارانی كۆماری ئیسلامی ئێران، هەڕەشەیەكی چاوەڕواننەكراو و زۆر توند و بێ موناسەبەی لە هەرێمی كوردستان كرد. حكوومەتی هەرێمی كوردستانیش، وەڵامێكی هێمن و دۆستانەی هەڕەشەكەی دایەوە، بە ئاشكراش ڕایگەیاند، هەرێمی كوردستان ئەو هەڕەشانەی قبووڵ نییە و ڕەتیان دەكاتەوە.
نازانرێت، هەڕەشەكانی سەردار سەلامی، تا چەند تەعبیر لە ڕای ڕەسمی دەوڵەتی ئێران دەكات، بەڵام بە دڵنیاییەوە، وەڵامەكەی حكوومەتی كوردستان، ڕای ڕەسمی حكوومەت و گەلی كوردستانە.
هەڕەشەكان چاوەڕواننەكراون، چونكە هەموو لایەك ئاگادارن، وا ماوەیەكە پێوەندییە دووقۆڵییەكانی كوردستان و ئێران، خەریكە گەرموگوڕییەكی بەرچاو بەخۆیەوە دەبینێتەوە و باسی پرۆژەگەلی ستراتیژی هاوبەش دەكرێت.
دیسان چاوەڕواننەكراون، چونكە كوردستان وا دوو ساڵە، بەدرێژایی هەزار و ئەوەندە كیلۆمەتر، شەڕی خەتەرترین دەوڵەتی تیرۆریستی دەكات و ئێران بەحساب خۆی بە یەكەمین دوژمنی ئەو دەوڵەتە تیرۆریستییە دەزانێت. چۆن دەچێتە ئەقڵەوە، كوردستانێك شەڕی ئەو هێزە زەبەلاحە تیرۆریستییە بكات، ئێرانیش بێت لە پشتەوە پەلاماری بدات. مەگەر ئێرانی هاوسێی هەرێمی كوردستان، یەكەمین سوودمەندی تێكشاندنی داعش نییە؟ ئەگەر خوانەخواستە كوردستان شكست بێنێتت، ئەمییەتی ستراتیژی ئێران گەورەترین زەبری بەرناكەوێت؟ ئەی كەواتە هەڕەشەی چی لە كوردستان دەكەن؟ دوای ئەوە ڕاستینەیەكی مێژوویی لەم ناوچەیەی ئێمەدا چەسپیووە: مانەوەی ئێران وەك دەوڵەت، هێندەی پێوەستە بە زیرەكی و ئیدراكی ئێرانییانەوە، هێندە بۆ هێز و هەڕەشە ناگەڕێتەوە. ئەقڵیش پێماندەڵێت، سەقامگیریی و ئاوەدانی و گەشانەوەی هەرێمی كوردستان، لە بەرژەوەندیی ئێراندایە، نەك تێكچوونی ئەمنییەت و وێرانكردنی.
هەڕەشەكان زۆر توندن، چونكە باسی وێرانكردنی كوردستان دەكەن. حكوومەتی هەرێمی كوردستان دەستی خۆش بێت، زۆر بە هێمنی و دۆستانە وەڵامی هەڕەشەی وێرانكردنەكەی داوەتەوە. بەڵام پرسیار ئەوەیە: بەڕاست وێرانكردنی كوردستان هەروا ئاسانە؟ جا خۆ وا بووایە، ئێستێ نە نەتەوەیەك مابوو پێی بڵێن كورد، نە خاكێكیش مابوو پێی بگووترێت كوردستان. ئێرانی هاوسێمان، لە هەمووان چاكتر دەزانێت، كورد و كوردستان چییان پێ نەكراوە، هەر ماویشن. مانەوە و دیفاع لە خۆكردن، قەدەری ئەم خاك و میللەتەیە.
هەڕەشەكان بێ موناسەبەن. ئاخر هەرێمی كوردستان جگە لە دۆستایەتی و بگرە موراعاتێكی، هەندێك جار زیاد لە ڕادەی خۆشی، چ زیانێكی بۆ ئێران هەبووە؟ بە دڵنیاییەوە، تەواوی كاربەدەستانی ئێران، ئەو ڕاستینەیە دەزانن. دەشزانن كە هەڕەشەكانی وێرانكردنی كوردستان و لەوە خراپتریش، ناتوانن ڕاستینەیەكی وەك ڕۆژی ڕووناك لە بیر خەڵك ببەنەوە: گەلێكی دەملیۆنی كورد لە ئێراندا دەژی تا ئەمڕۆ، لە خوێندن بە زمانی دایكی، بەو زمانەی خوا پێی ڕەوا بینیووە مەحروم و بێبەشە.
بۆیە گومانی ئەوە لەم هەڕەشانە دەكرێت گەڕانەوە بێت بۆ هەمان ئەو هاوكێشە لاسەنگ و تێگەیشتنە كەموكورتەی لە بارەی كورد و كوردستانەوە بە درێژایی بە سەر تەواوی دەوڵەتان و زهنییەتی نەتەوە سەردەستەكانی ناوچەكەماندا زاڵ بووە. گەڕانەوەیە بۆ ئەوەی كورد و كوردستان بە "كەمەرەی شل"ی ناوچەكە بچوێنن. بەو مانایەی هەر لایەك پێویستی بە پێشاندانی باڵادەستی خۆی بوو بە ركابەرانی، پەلاماری كوردستان بدات تا ئەوان چاوترسێنكات، یان ئەو دەوڵەت و نەتەوانە، بێن لەسەر خاكی كوردستان و لەسەر شانی كورد، حسێب و كێشەكانی خۆیان یەكلا بكەنەوە.
ڕاستتان دەوێت، ئەو هاوكێشە زاڵمانە پشتوبەستووە بە هۆكارگەلی جوگرافی و سیاسی و ئابووریی، لەگەڵ ڕاپەڕینی 1991دا تێكچوو، لەگەڵ ڕووخاندنی ڕژێمی سەدامیشدا لە 2003ەوە نەماوە. كورتوكرمانجی، چیتر، دەوڵەتان و نەتەوەكانی دەوروبەرمان ناتوانن، شەڕی خۆیان لەسەر شانی ئێمە بكەن و بە ئێمە یەكتری بترسێنن.
لێرەدا تەنیا بواری بیرخستنەوەیەكی دۆستانە ماوە: هەولێر بۆ هەموو دەوڵەتانی ناوچەكە هێڵی سوورە، نەك بە تەنیا بۆ دەوڵەتە تیرۆریستییەكەی داعش كە تەماعكردنی لە هەولێر، وا سەری دەخوات.